Trump-a’n indo a tawp hnaih ring, Pak palaiin Tehran thleng
US President Donald Trump-a chuan Iran laka Israel nena indona an kalpui chu a tawp hnai tawh tih a sawi a, palai Pakistan sipai hotu pawhin buaina chhuah thar lehna tur ven tumin Tehran a thleng leh ta bawk.
An kara palai kal hi US leh Iran thuneituten Pakistan-a inbiak leh tura an ngaihtuah an sen lai a ni a, Islamabad-a inbiakna hmasa chu Pathianni khan rah tha chhuah lovin a tawp a ni.
Kar hmasa atanga inkahhai an kalpui mek pawh Israel chuan Iranian-ten pawhsei an beisei thu a sawi bawk.
Pakistan-a sipaite chuan Field Marshal Asim Munir-a’n Tehran a thleng tih an nemnghet a. Iranian thuneitu sangte chuan Reuters hnenah inbiakna neih tawha palai hian Iran-ah hian ram pahnihte inkara inrem lohna awm tihziaawm tumin a kal mek tih an hrilh bawk.
Trump-a chuan ABC News reporter Jonathan Karl-a hnenah, “Kan hma lam ni danglam tam pahnih hi kan thlir dawn niin ka hria,” tiin a hrilh tih X-ah a tar lang inkahhai hi pawh sei a ngai dawn lo niin a sawi bawk.
“A tawp tep niin ka ngai a. Ka thlir danah a zo tep tak zet a ni,” tiin Trump-a hian Thawhlehni-a Fox Business Network-in an kawmna, Nilainia tihchhuahah a sawi a. “Eng nge thleng dawn tih kan hmu ang a. Inremna siam an duh hle niin ka hria,” a ti.
Pakistan, Iran leh Gulf rama thuneitute pawhin ram pahnihte hian Islamabad an pan leh thei tih an sawi hlawm bawk.
Kar tawp lama inbiakna khan Trump-a’n February 28 atanga Israel nen Iran an beiha Iran-in an thenawm Gulf ramte a beih ve avanga buaina chhuak leh Israel leh Lebanon-a Iran thlawp Hezbollah inkara buaina chhuak titawp thei lovin an tin.
Trump-a’n beiseina a neih leh hian khawvel puma stock dinhmun a tisang leh nghal a. US-in Iran lawng chawlhhmun a dan avanga Iran-a lawng lut leh chhuak a tawp thu a sawi hnuah tuialhthei man chu barrel khat $95 vel a ni.
Britain kaihhruai ram sawmhnih vel finance minister-te chuan US, Israel leh Iran chu a taka inkahhai kalpui turin an ngen a, buaina hi chin fel thuai a nih pawhin khawvel eibar leh sumdawnnain a tuar hle tawh dawn tih an sawi.
Trump-a chuan Thawhlehni khan New York Post hnenah palaite chu Pakistan-ah an kir leh mai a rinawm thu a lo sawi tawh.
Iran-in nuclear ralthuam neih a tum chu kartawp inbiaknaah khan an mutan a ni a. US hian Iran-in nuclear a khawihna zawng zawng kum 20 chhung tihtawp a rawt a, Tehran-in kum thum atanga nga chhung tihtawp a rawt thung.
Washington hian Iran atanga nuclear ralthuam siam nan hman theih hmanraw tihchak paih chhuah vek a duh a, Tehran-in a laka hrekna hlih a phut bawk.
Indona avang hian Iran chuan khawvela tuialhthei leh boruakalhthei thawn chhuahna kawng pawimawh, Strait of Hormuz chu an ram lawng ni lo tan a khar a, hei vang hian hian Gulf atanga thil thawn chhuah, a bik takin Asia leh Europe-a thil thawn nasa takin a tihtlem a, energy la luttute an buai hle.
Indonaah hian mi 5,000 vel an thi tawh nia chhut a ni a, Iran-ah mi 3,000 vel an thi a, Lebanon-ah mi 2,000 vel an thi a. Tehran province governor chuan thi zinga tam tak chu zirlai, hmeichhia, zirtirtu leh university professor an nih thu a sawi bawk.