Turkey sikul-a silaia inkahnaah mi pakua thi

Turkey sikul-a silaia inkahnaah mi pakua thi
Turkey chhim lama sikul pakhata silaia inkahna thlengah zirlai pariat leh zirtirtu pakhat an thi a, mi eng emaw zatin hliam an tuar bawk niin Interior Minister Mustafa Cifci-a’n a sawi.
Kahramanmaras-a Ayser Calik Secondary School-a thleng a ni a, a kaptu nia sawi hi a thi bawk niin Governor Mukerren Unluer-a’n a sawi.
Turkey chhim lam thova high school-ah a hma ni chiah khan an zirlai hlui pakhatin mi 16 a lo kap hliam tawh a, amah a intihhlum zui.
Ciftci-a chuan mi 13-in hliam an tuar tih sawiin an zinga paruk chu an dinhmun a tha lo hle.
Nilainia pawikhawihna thlen chhan hi hriat a la ni lo a, chhui chian mek a ni.
Turkish chanchinbute chuan pawikhawihna thlentu hi tleirawl nia rin a nih thu leh classroom pahnihah a lut a, silai panga leh a mu bawm (magazine) pasarih a keng a, Unluer-a chuan a pa, police officer hlui ta a nih a rinawm thu a sawi.
Pawikhawihtu nia rin pa hi a hnuah police pawhin an man zui niin tual chhung chanchinbute chuan an tar lang.
Video darhah chuan mite chu school chhawng khatna tukverh atanga zuang chhuakin hmun him lam pana an tlan chhe lai a lang.
Turkish broadcaster NTV reporter chuan, “Silai ri hi a nasa hle a ni,” tiin, ‘sikul chhehvelah mite pawh an chiai nasa hle’ tih a sawi bawk.
Silai hmeh puah thu a darh hnu hian mittui tla chungin nu leh pate chu sikul tualah an pungkhawm nghal a. Turkish President Recep Tayyip Erdogan-a chuan ‘kan fate, kan chhungte leh kan zirtirtu hliam tuarte an dam thuai ka duhsak’ tiin X-ah a tar lang.