MBBA Season Opening 2025

MBBA Season Opening 2025
Mizoram Basketball Association (MBBA) chuan kumin 2025 chhunga inelna a buatsaih hmasakber season opening tournament chu women’s league club pathumte bakah Mizoram Super League (MSL) leh D League tan a buatsaih a, he league pahnihah hian club 8 ve ve awmin, D League hi MSL hnuai chiaha league a ni.
June ni 11 (Nilaini) zan khan a hnuai club tarlante hian semi-final an khel a, Electric BC leh Vanguard BC-te’n an tumpui ve ve an hneh bakah women’s league lamah Bungkawng chuan 60-40-in Mission Veng Hot Shots Basketball Club an hneh ve bawk.
D League semi-final result chu hetiang a ni: Chawnpui BC lakah 92-61-in Electric BC an chak a; Vanguard BC chuan 88-76-in Nursery SC an hneh thung.
Nizan, June ni 12, Ningani zan khan MSL club-te’n semi-final an khel ve thung a, he thu buatsaih lai hian Zarkawt BCA vs Chanmari BC leh Khatla TBL vs Zemabawk BC inkhel result tarlan hman a ni lo.
Season Opening 2025 hi Hawla Indoor Stadium, Republic Vengthlanga khelh niin, ruahman lawk ang chuan June ni 14 hian MBBA hnuaia MSL, D League leh Women’s League-ten final an khel dawn a ni.