Mboko vs Osaka ?!

Mboko vs Osaka ?!
World number 333-na ni chunga kumin kum bul tan ve leih leih chauh Canadian mihang tleirawl kum 18 mi Victoria Mboko chuan tennis inelna level sang WTA 1000 final a lut ta rup a, nizan Canadian Open final result tarlan hman tak lohah world number one hlui Naomi Osaka hnehin lasi thawnthu ang maiin Montreal khaw tournament tawp a khar ta em hriat hman a ni lo!
WTA ranking-a 85-na ni chunga tournament hmachhawn Mboko hian semi-final pakhat zawkah 2022 Wimbledon champion hial lo ni ve tawh Elena Rybakina lehzel a barakhaih leh!
World number three ni mek Rybakina lakah hian wildcard entry hmanga Montreal khaw tournament khel pha ve chauh Canadian tleirawl hian chiang fahranin set khatna a hloh a, a vanneihnain a tlin zozai tawh dawn lo nia ngaihna a nemnghet!
Chuti chin chu an thawnthu tawpna ani ta awzawng lo a, a career la tawi taka WTA 1000 final a luh vawikhatna ni turin kum 26-a upa Kazakhstani No. 1 ni mek lakah 1-6 7-5 7-6 (7-4) hnehna a sualchhuak leh ta mai a, home fans tana fanu tan manawm a ni chiang hle!
Final a luh hnu court chhunga an kawmnaah Mbokop chuan amah tantute chunga lawmthu sawiin, an thlawp tlatna chuan hmalam pan turin a nawr tih a sawi a, “Nangni tel lo chuan heti chena thui hi ka inpawh thlen zawh ka ring lo,” a ti.
Canadian tleirawl hi karleh tira hmeichhe ranking thar tarchhuah turah top 50 huang a luah phak tawh a rinawm a; Montreal khaw final a luhna kawng a hneh tawhte zinga Coco Gauff leh Sofia Kenin an tel ringawt pawh hian he tualchhung player chimchin hniam lohzia chu a pholang chiang mai awm e!
Open Era an tih china wildcard ni chunga Canadian Open final thleng zo pahnih an awm tawh a, chu’ng mite chu Monica Seles (1995) leh Simona Halep (2015)-te niin Mboko hi a pathumna a ni.
Semi-final lehlamah Japanese Osaka chuan 6-2 7-6 (9-7)-in Danish 16th seed Clara Tauson a paltlang ve bawk a;
kum 27-a upa Asian nu hi Open Era-a Japanese player zinga Canadian Open final thleng thei hmasaber a ni nghal.
Toronto khaw lama Canadian Open mipa singles khelhah three-time Grand Slam runner-up leh men’s top seed ni bawk Alexander Zverev chu rinkai zawk ni chungin Russian 11th seed Karen Khachanov lakah 6-3 4-6 7-6 (7-4)-in a tlawm ringawt!
Kum 29 mi Khachanov khan ATP singles ranking tharah 12-na a luah chho dawn a; tun hi ATP Masters 1000 final a luh tum hnihna niin, a hmasa zawk chu kum 2018 Paris khawpuia Novak Djokovic a barakhaih kha a ni.
Semi-final lehlamah American fourth seed Ben Shelton chuan a chipui leh second seed ni bawk Taylor Fritz chu straight sets 6-4 6-3-in a hneh nawlh a, rinkai lo zawk ni chunga a tlang hnuin zanin hian Khachanov nen final an khel ang.
Kum 22 leka upa Australian Open semi-finalist Shelton hi kum 2004-a Toronto final lut Andy Roddick-a hnu lama American zinga ATP Masters 1000 final thleng leh zo naupangber a ni.