MCC bawhchhiaa puhte insawifiah

On Apr 18, 2026 1 0

MCC bawhchhiaa puhte insawifiah
Aizawl Municipal Corporation inthlanpui neih turah election model code of conduct bawhchhia nia puh, thuneitute hnenah complaint a luh anga insawifiah tura tihte chu an insawifiah.
Model code of conduct (MCC) bawhchhiaa puh zingah hian minister, adviser to chief minister leh member of Parliament an tel a. State Election Commission-in insawifiah tura lehkha a pek zing ami minister PC Vanlalruata chuan, SEC secretary hnenah ziakin a insawifiah a. AMC huamchhung Saikhamakawnah April 15 tlai khan thianho chaw an eikhawm a, office atangin a office car-in a kaltlang a, campaign-a kal an nih loh avangin a driver pawhin fimkhur nachang hreloin a designation plate khuh loin a lo dah mai niin a sawi.
Chutihrualin, AMC inthlan campaign sosan lai taka a office motor nena hetianga a lo leng chhuak chu thiam lo a inti a, ngaihdam a dil tih sawiin, tun hnuah chuan a lo fimkhur tawh tur thu a sawi a ni.
“Kan tlai office bang, office motor-in ka kaltlang nghal a, kan chaw eina tur in bul kawngpui sirah motor hi designation plate pawh khuh loin driver-in a lo dah mai a, chu chu Congress party member-ten lo hmu in, engmah thil hrechiang loa thla la in, hetiang hian i hnenah an rawn thlen a, pawi ka ti hle a ni,” tiin PC Vanlalruata hian SEC secretary hnenah ziakin a thlen let a. Campaign an ni loa, thianho chaw eikhawm mai an nih avangin a driver pawhin fimkhur nachang a lo hre lo a ni, tiin a sawi.
He chaw eikhawmnaa tel ve tho, adviser to CM Lalmuanpuia Punte, MLA pawhin minister PC Vanlalruata sawi ang zulzui tho hian SEC secretary hnenah insawifiahna thu a thlen a. A driver hi an chaw eikhawmna thenawm Tlangnuam Veng-a awm thar a nih avangin, chaw eikhawmna tur in an thlen hnu hian a PSO nen a driver hi chu an in luah lamah hian an kal daih nghe nghe a, an haw dawnah a ko let leh chauh niin a sawi.
A ni pawh hian campaign-a kal ni lo mah se, a lo fimkhur tawk lohnaah SEC hnenah hian ngaihdam a dil a ni.
Insawifiah dang pahnih – Lok Sabha MP Richard Vanlalhmangaiha leh minister C Lalsawivunga chuan MCC bawhchhia nia an inhriat loh avangin ngaihdam an dil loa, bawhchhia nia puh an nihna hi hnawlsak turin an ngen thung.
Complaint thehluhna, District Municipal Election Officer office atanga insawifiah tura tihna a chhannaah MP Richard Vanlalhmangaiha hian, April 11-a Republic Vengthlang leh Uper Republic YMA hnena Bolero pik up pe leh, election model code of conduct bawhchhia anga hek a ni chu pawi a tih thu a sawi a. YMA Republic Vengthlang leh Uper Republic Branch hian a MP (LS) fund atanga an dawn theihna tur hian 2026 February 16 khan approval pek a ni tawh a, February 25-ah fund hi pekchhuah niin, lirthei hi March 6 khan Upper Republic YMA hian register felin (registration number MZ-01 AF 7667), Republic Vengthlang YMA hian March 10 khan an register fel (MZ-01 AF 7843) tih a sawi.
‘MP (LS) Fund hi approval atanga lirthei registration tih fel ni thleng hian AMC inthlan puan a la ni loa, AMC inthlan tur hi March 18-ah puan a ni. Inthlan puan a nih hma hi chuan model code of conduct bawhchhiatna a awm thei lo. Heti chunga MCC bawhchhia anga hekna thehlut duh an awm hi mak ka tiin pawi ka ti hle a ni,’ a ti.
Heknaah hian political party leh candidate-te tana MCC-in dan a zamah bawhchhiat a nei lo tih sawiin, he complaint lut hi kalpui chhunzawm loa, hnawl mai turin a ngen tih a sawi.
Aizawl South-I bialtu MLA, minister C Lalsawivunga pawh Municipal Election Officer hnenah hian a insawifiah a. April 11-a Republic Vengthlanga transformer dah tiam anga hek a ni chu pawi a tih thu a sawi. ZPM sawrkar hnu ah electrical power transformer mamawhna nasat zia hria in sawrkarin a thar dahbelh tumin hma a la a. Republic Vengthlangah pawh AMC inthlan puan hma daih tawh khan transformer dah tura ruahman tawh niin, a hmunhma tur pawh inthlan puan hma hian tihfel a ni tawh tih a sawi a ni.
April 11 hian a bial Republic Vengthlangah party worker-te nen an campaign a, house to house campaign neih pahin transformer dahna tur hi an thlirho a, heath hian model code of conduct bawhchhiatna awma a hriat loh thu a sawi.
A ni pawh MP Richard Vanlalhmangaiha ang hian, hek a nihnaah political party leh candidate-te tana MCC-in dan a zamah bawhchhiat a nei lo tih sawiin, he complaint lut hi kalpui chhunzawm loa, hnawl mai turin a ngen tih a sawi a ni.