Meghalaya & Assam inkalpawh lehna tur pawm lailawk

Meghalaya leh Assam-a taxi khalhtute chuan ramria inkalpawh lehna tur an pawm a, Nilainia Shillong-a tharum thawhna thleng ang kha a thlen nawn leh hlauvin September 10 thleng inkalpawh leh rih phawt ni se tiin Pathianni khan an inrem.
Meghalaya deputy chief minister, transport ministry changtu ni bawk, Sniawbhalang Dhar-a chuan tourist taxi association-ten sorkar nena hmanhmawh taka an thutkhawm hnuah ramri kân leh an tum tih a sawi a. Transport thuneitute leh state pahniha taxi association-te chu September 10-ah thutkhawm leh ni se an ti bawk tih a sawi.
“Vawiin atanga September 10 thleng inkalpawh leh phawt ni se an ti a. Assam-a mite nen kan indawr zui ang a, anni pawhin tha taka min lo dawnsawn ka beisei a. Tun atang chuan a hma angin zalen takin kan inkalpawh leh dawn a ni,” a ti.
All Khasi Meghalaya Tourist Taxi Association (AKMTTA) President Ricaldinus Dohling-a chuan an pawl chuan 10 chhunga an buaina tihfelsak turin hun an pe a, an kal zel dan tur chu an la ngaihtuah tur thu a sawi.
“Tunah hian a lailawk atan inkalpawh leh ni se kan ti rih phawt a. Damsite-a kan thiante pawh vawiina kan thutlukna hi kan sawipui ang a, ni 10 chhunga sorkar hmalakna lo ngaichang turin kan ti ang a, rah tha pawh a chhuah ngei kan beisei,” a ti.
Assam cab operator-te chuan Jorabat-ah ni thum chhung ramri an lo dang tawh a, hei pawh hi Inrinni tlai khan Assam Border Protection & Development Minister Atul Bora-a nena an inbiak hnuah an hawng.
Assam-a cab khalhtute hian Meghalaya lirtheite chu Shillong-a tharum thawhna thlenga Assam mi leh an lirthei beih a nih duh loh nan an dang a. Khasi Students’ Union (KSU)-in ‘black-flag’ motorcycle rally an huaihawtah khan Assam lirthei an bitum bik niin an sawi a ni.
Rally-ah khan zirlaite hian thil phut panga an neih tihhlawhtlin phuta an huaihawt niin tharum thawhna nasa tak a thleng zui a, thil tam tak suasamin lirtheite pawh an hal a ni.
Assam Chief Minister Himanta Biswa Sarma leh Meghalaya Chief Minister Conrad Sangma te chu Zirtawpni khan an lo inbe tawh a. Sarma hian inbiakna kalpui zel tura mawhphur turin Bora ruatin Dhar-a nen Inrinni khan Guwahati-ah darkar thum an inbia.
Dhar-a hian Nilainia thil thleng pawi a tih thu leh a mawhphurtute hrem an nih tur thu as awi a. Assam leh hmun dang atanga khualzin leh lirthei lutte himna tiamin Meghalaya sorkarin mawhphurhna a lak tur thu a sawi.
KSU president, vice-president leh general secretary te chu Meghalaya Maintenance of Public Order Act tlawhchhana man an ni a. Special Investigation Team (SIT) dinin Assam lirthei beitute an chhui bawk.
Pathianni khan Bora hian Assam-a mi mal transport association 14 aiawhte anlirthei, a khalhtu leh a chuangte himna chungchangah a bia a. Sangma leh Dhar pawh kawng dan chungchangah a be leh bawk.
Transport association-te hian Meghalaya-a an himna an phut a, Assam mite beihna a thleng fo niin an sawi bawk a. Hei hi Bora chuan Meghalaya sorkar hnena a thlen tur thu a hrilh.
Hetih lai hian Shillong-ah chuan venhimna khauh taka kalpui niin KSU-in Thawhtannia Barik-a lungawi loh lantir an tum chu a hmaa thil thleng avangin phalna pek an ni lo