Meghalaya BJP chief-in amah pawhin bawngsa a ei thu a sawi

Meghalaya Bharatiya Janata Party (BJP) state chief Ernest Mawrie chuan Meghalaya-ah bawngsa ei khuahkhirhna a awm lo, amah ngei pawhin a ei thu a sawi.
Ernest Mawrie chuan, “State dang tena resolution an siamah sawi theih ka nei lo va. Meghalaya-ah thung chuan tute pawhin bawngsa an ei vek a, khuahkhirhna a awm lo. Kei ngei pawhin bawngsa ka ei a. Meghalaya-ah bawngsa ei khap a awm lo. Mipui te nunphunga bet a ni a, tute mahin an khap theih a ni lo. India ramah chutianga khapna dan pawh a awm hek lo. State thenkhat ten an khap a ni mai a. Meghalaya-ah chuan sa talhna hmun kan nei a, tute pawhin an bawng te, vawk te talhin market-ah an hralh leh mai a, a hygenic bawk a, mipui tena tih thin dana an neih a ni,” tiin a sawi.
Hetih lai hian BJP rorelna Assam state chuan bawng talh khap, phurh leh sa hralh khapna siamin Assam Chief Minister Himanta Biswa Sarma, North Eastern Region a BJP te hmel lanna ber chuan mipuite chu Hindu te chen tamna hmuna bawngsa ei lo turin ngenna a siam thung a ni.
Political party thenkhat tena BJP chu anti-Christian party tia an sawi chungchangah Meghalaya BJP Chief chuan chu chu ‘political propaganda’ mai a ni tiin a chhang thung a.
Mawrie chuan, “National Democratic Alliance (NDA) sorkar kum kua lai a kal tawh a. Biak In pakhatmah beihin a la awm lo. Opposition tena BJP hi anti-Christian party an ti fo hi election propaganda mai mai a ni a. Meghalaya chu Kristian tamna State niin mi tute pawh Biak In a kal thin an ni,” tiin a sawi bawk a.
“Goa pawh BJP rorelna hmun a ni a, Biak In pakhat pawh beihin a la awm lo. Chutiang bawkin Nagaland pawh a ni tho. Political party thenkhat a bik takin Congress, TMC leh party thenkhatte te auhla mai mai a ni. Kei pawh Christian ka ni a, Biak Inah inkhawm suh tiin min la hrilh ngai lo,” tiin Ernest Mawrie chuan a sawi bawk.
Ernest Mawrie chuan BJP te chuan Meghalaya-ah sorkar an siam tur thu sawiin, Meghalaya mipui ten inthlak danglam an duh tawh, a ti bawk a.
Survey kan neih ang chuan double-digit MLA neiin sorkar kan siam ang, tiin Ernest Mawrie chuan a sawi a. Meghalaya hi February 27 ah an inthlang dawn a ni.