Meitei 400 chuangin Mizoram chhuahsan

Manipur-a Zo hnahthlakte leh Meitei inbeihna kaihhnawihah tun hnaiah Mizorama awm Meitei 400 chuangin Mizoram an chhuahsan a, a tam ber chu Aizawl atanga chhuak an ni.Kar hmasa Zirtawpni khan Mizorama Meitei-te fimkhur tura tihna lam hawi thuchhuah a awm a, Meitei awm zat chhiar tum an awm bawk. Chumi hnu-ah Mizorama Meitei 400 chuangin Mizoram an chhuahsan a ni.
Police te’n an hriat theih chinah, Inrinni khan Meitei 55-in Lengpui Aiport atangin Mizoram an chhuahsan a, Chawlhni-ah mi 78-in an chhuahsan leh. Vairengte check gate paltlangin Inrinni-ah mi 19-in Mizoram an chhuahsan a, Chawlhni-ah mi 226-in an chhuahsan leh.
Thlawhna leh Vairengte paltlangtu national highway hi Manipur pan theihna tur kawng pawimawh a ni a, Ngopa lamah chuan Churachandpur district paltlang a ngaih avangin an kal lo turah ngaih a ni.
NEEPCO hnuaia thawk mi 42 te’n Saipum leh Saiphai lam atangin Manipur an pan tawh bawk a, Chawlhni tlai lam thleng khan Meitei 419 velin Mizoram an chhuahsan tawh tih chu police-te chhinchhiah dan a ni.
Mizoram Police hotute chuan Mizoramah Meitei tuman kut an la tuar lo tih an sawi a, May ni 3-a Manipur buai hnuah Mizoramah Meitei-in kut an la tuar lo a, tun hnaiah Mizoram atanga chhuak an awm na a, kuttuar an awm lo tih an sawi.
Zirtawpni atang khan Mizoram Police te’n Meitei awmna hmun thenkhat, Mizoram University, RIPANS leh ZMC-ah te ‘duty’ an indah a ni.
May thla tir lamah khan Meitei engemaw zatin Mizoram an lo chhuahsan tawh a, mahse rei vak lovah Mizoramah an kir leh. Mizoram chhuahsantute pawh hi an him loh vang ni lovin Manipur-a an chhungte’n an ngaihtuah lutuk a, haw tura an tih avanga kir an ni tlangpui tih thu dawn a ni.