MES siam ngei kan tum – CM

ZPM party-in manifesto-a an dah, an sawrkar chuan Mizoram Education Service siam an tiam chu tihhlawhtlin ngei an tum tih chief minister Lalduhoma chuan a sawi.
Mizo Students’ Union Gen. Hqrs hruaitute chuan Nilaini khan chief minister hi lawmpuina hlan pahin an kawm a. ZPM Manifesto 2023 chapter VI (h) ‘Mizoram Education Service (MES) nei tura hma lak a ni ang’ tia dah a ni chu Mizo zirlaite aiawhin lawmawm an tih thu an thlen a. MESe hi Mizoram zirna siamthatnana pawimawh tak a nih avangin a hlawhtlin hun an nghakhlel a, a hma thei ang bera tihlawhtling turin an ngen.
Mizoram budget-a college zirlaite an zirna kaihhnawiha zinna tur, ‘study tour’ hnuaia cheng nuai 50 dah thin chu college hrang hrang zirlai an pun zel avangin tipung turin chief minister hi an ngen bawk.
Chief minister chuan Mizoram Education Service siam chu tihhlawhtlin an tum tur thu a lo hrilh a ni.