Messi ropui zual zel!

Messi ropui zual zel!
Final liana vawi thum ngawt Argentina a tlawmpui hnuah international football chawlhsan zet mah se ram pumin an auh nasat em avangin 2018 Fifa World Cup khel tur zawnnaah ram tan national team-ah Lionel Messi a kirleh a; tournament tak tak round of 16-ah France ngam loin an tla zui leh ta mai a!
2022 World Cup khel turin an tur chhuak leh a, kum 36 chhunga a vawi khatna atan an ram chu World Cup-ah a champion-pui a.
Kumin World Cup-ah pawh a ho bawkin Argentina an inlan chhunzawm leh a, nimin zing khan a goal thum tihluh hmangin an bultanna inkhelah sithum faiin Algeria an sawp leh ta phawt!
A kum 39-na piancham lawm tura chawlhkar khat bak nghah ngai tawh lo Messi hi 2026 Fifa World Cup kal meka hat-trick siam thei hmasaber a nih piahlamah World Cup chanchina hat-trick siam thei upa ber a ni a, a hma chiaha kum 33 leh ni 130-a upa ni chunga record kawltu Cristiano Ronaldo kut atangin record a chhuhsak a, he mite pahnih hian eng tik khaw tikah mah inlehthal an bang duh dawn lo a nih awm hi maw!
Algeria laka a goal thum tihluh hmang khan Argentine great hian World Cup history-a goal thun hnem ber German mi hrang Miroslav Klose goal khawlkhawm zat 16 a nihrualpui tel lehzel bawk a, tun group stage khelh chhung ngei hian he record ropui hi a malkhalh hman ngeiin a rinawm nghe nghe!
Nilaini zing inkhel kha Inter Miamia captain tan senior international match 200 a khelh tlinna chiah niin, Serbia and Montenegro laka a World Cup debut a nghah chhuah atanga a kum 20-na chiahah a tum khatna atan World Cup-ah hat-trick a puitlin ve ta nge nge a, kum 40 hnaih tawhah pawh ropui zual zel bak Argentina captain hian hmabak a nei lo a ni ber!
Argentina hian kum 1982 leh 1990 khan defending champion ni chungin World Cup hi an lo khel tawh a, an title kawl lai an humhim zo lo ve ve a, kha mi tum khan Lionel Messi chhawr tur an la nei lo a, kumin hian Messi kawl chungin defending champion an ni leh a, title hum zo tawh tak ang maw?!
Tun kha World Cup defending champion ni chunga an match hmasabera Argentina chak vawi khatna niin, a chunga tarlan ang khian a hmasa pahniha an bultanna inkhelah an tlawm ve ve a, an trophy kawl lai pawh an humhim zo lo ve ve a, kumin chu champion lai ni chunga an game khelh hmasaberah chiang fahranin an chak a, an kum that kum a ni ve tawh dawn a ni’ang!
Nimin zinga eight-time Ballon d’Or winner goal hmasa ber hi offside vangin hnawl a ni phawt a; chutah minute 17 an khel tling tihin penalty area pawn atangin long shoot pui lutuk hmangin a goal hmahruai a chhuihlut ta tho a ni.
A goal hnih dang chu second half minte 60 leh 76-a a tihluh niin, Kansas City Stadium-a a team-mate zawng zawng kha an captain tan hian an thawk vek a ni ber a, an chance neih pawh kha Messi hnen atanga chhuak a tam ber a, three-time world champion Argentina tana an superstar hlutna hi a la sang vet vet kher mai!
Mipa zinga World Cup tum ruk khel tling thei hmasaber Messi goal hmahruai siamsaktu kha Inter Miami lama a team-mate Rodrigo De Paul niin, France legend Zinedine Zidane-a fapa Luca Zidane-a ven goal-ah chiang fahranin a chhuihlut a; tun kha World Cup match 27 a khelh tlinna chiah a ni bawk.
Zidane kha Algeria thisena lo piang ni mah se France tana khelh a thlang a, a fapa erawh an thlahtute zikchhuahna ram tan a inlan ta nge nge a ni.
Group J lamah Argentina hian team nem zawk tura ngaih dang pahnih Austria leh Jordan an su zui leh dawn a, group stage chu nuamsaa paltlang tura ngaih ngheh an ni!
Qatar ram 2022 World Cup-a Argentina a champion-pui hnu khan Messi hi chawl ve tawh turin an ngai a, a sawiseltu pawl lam chuan tuan muang tawh, Europe-ah pawh inkhel tlak tawh lo ang tho thangin an chhuah a, ram tana inkhelh a la bansan lote kha mak an tih thu an sawi hlawm a, mahse, Algeria laka a bultanna enin Argentina-in chawl lo tura an la tahawh ngawih ngawih chhan hi a chiang tawk viauin a lang!