Met Gala 2024-ah milarte an inlar

2024 Met Gala chu an rama May ni 6 khan New York City-a Metropolitan Museum of Art-ah an nei leh ta, kumin hian Bad Bunny leh Jennifer Lopez te chu he event co-chair an ni a, Zendaya, Chris Hemsworth leh Vogue editor-in-chief Anna Wintour te pawh chair an ni. He co-chair panga te hi Met Gala openingah white carpet-ah nalh takin an inlan vek bawk a ni.
Met Gala hi May thla thawhtanni hmasa berah an nei thin a, an fashion chu he event-in ngaihven a hlawhna pakhat a ni thin. Met Gala-ah hian dress code theme an nei thin a, kumin theme chu ‘Garden of Time’ tih a ni a, he dress code hi 1962-a JG Ballard-a thawnthu tawi ‘Garden of Time’ inspire a ni.
Kumin exhibit theme, ‘Sleeping Beauties: Reawakening Fashion’ tih niin, Costume Institute permanent collection item 250 vel awm tur a ni a, he exhibit hi museum-ah hian May ni 10 atangin an tar chhuak dawn a, chung zingah chuan 17th century English Elizabethan-era bodice leh Christian Dior hmingchherna pakhat Junon leh Venus ballgown te, 21st century lam atangin designer Phillip Lim, Stella McCartney leh Conner Ives te kutchhuak pawh tar chhuah a ni ang.
Met Gala hi Met Costume Institute tana sumtuakna cocktail & dinner party a ni a, sawmbik te tan chauh tel theih niin, designer leh brand hrang hrang hrang tan an kutchhuak pholanna tha tak a ni a, mi 400 vel sawm thin an ni. Met Gala-ah hian a chhunglama an hun hman dan social media a tihchhuah phal a ni lova, a chhunga an luh tawh chuan phone camera hman phal a ni tawh lo, mahse, celebrity-te hian bathroom selfie te chu an post deuh fo tho. Nikum Met Gala-ah khan dollar maktaduai 22 vel an tuak ngah thei a ni.