Meta nen Twitter ang tak ‘Threads’ siam

Meta chief Mark Zuckerberg chuan Twitter eltu tur Threads apps an tlangzarh thu a sawi a, Mithiam te chuan thread hian tun hnaia inthlak danglam nasa tak Twitter hmangtu lungawi lote sawm viau turah an ngai.
Threads hi US bakah ram 100 chuangah tlangzarh niin user chuan 500 character a post thei a, Twitter ang bawkin feature tam tak a nei a ni.
Zuckerberg chuan an platform thar chu ‘friendly’ tia sawiin chu chu an hlawhtlinpui ber tura an ngaih a nih thu a sawi bawk a. ‘Twitter aia lian a ni ang’ tiin Zuckerberg chuan sawi bawkin, “hun erawh a duh ang a, mahse, public conversation app 1 billion tena an hman a nih ka ring,” tiin a sawi.
“Twitter ten chutiang ni thei tura hun remchang tha an nei a, mahse an hlawhtling lo. Keini chu kan hlawhtlin ka beisei,” tiin a sawi bawk.
Instagram-owner Meta te chuan an app thar chu ‘initial version’ tia sawiin, “Threads hmangin Instagram thatna te lain kan tilian dawn a ni,” tiin an sawi bawk.
Threads hi standalone app a ni chungin Instagram account atangin luh theih a ni dawn tho va, Instagram username chu hman theih a ni ang a, chutih rualin Threads bik tan profile hran neih theih a ni ang.
Twitter elpui apps dang dang Bluesky leh Masodon te pawh a awm a. Mahse, chungte ai chuan Threads chuan Instagram nena inthlunzawm a nih avangin advantage a nei bik tura ngaih a ni thung.
Threads-ah chuan post te chu apps pahnihah pawh share zung zung theih niin photos, video te pawh minute nga awh pawh in share theih a ni dawn a. Users te chuan post feeds ‘threads’ tia an sawi chu mi an follow leh recommend te atangin an hmu thei dawn a ni.
Drew Benvie, chief executive of social media consultancy Battenhall chuan Threads chu Twitter nen a inang hle tiin a sawi a. “Thil langsar ber chu text-first niin chumi hnuah user te chuan thlalak leh midang post pawh an comment thei a ni,” a ti a. “An post sei theih lam pawh Twitter ang tur tho niin a lang a, twitter nen a inang hle a ni,” tiin a sawi bawk.