Minister leh MLA ten MHIP Day an hmanpui

July 6 – MHIP Day vawi 49-na lawm chu minister leh MLA ten hmun hrang hrangah an hmanpui.
Minister Dr R Lalthangliana MHIP Sialhawk Branch a hmanpui a. Nu thain fa tha a hring thin, tih chu a hmuh dan a nih thu sawiin, “Nuin mawhphurhna lak tak tak hi a pawimawhin a ko a rit hle a. Zirna lama san tir ringawt ni lo, khua leh tui tha, ram leh hnam hmangaih, ruihhlo laka fihlim hring turin nute ka fuih thar a. Kan neih hlu ber kan fate kan hloh si chuan sum dehchhuah tam leh hausakin awmzia a nei loang,” a ti.
Minister C Lalrinsanga chuan MHIP Lunglei Venglai Branch a hmanpui a. Tunlai khawvel hmasawnna thangduang karah Pathian tihna tak tak nei turin kan tu leh fate kaihhruai a ngai tih a sawi a. Kan thalaite zingah ram leh hnam hmangaih nachang hre lo tam tak an awm ta a, ram leh hnam vei tura zirtir a ngai tih a sawi a ni.
Minister Er Lalrinawma chuan MHIP Tlungvel Venghlun Branch a hmanpui a. Mizo hmeichhiaten an ngaihsan leh an ngaihhlut ten kan nunah nasa takin nghawng a neih thin avangin ngaihsan tur dik kan ngaihsan a pawimawh tih a sawi. Chhungkua, ram leh hnam hmasawnna kawngah hmeichhiate an pawimawh tih sawiin, “Zirna hmasa ber chu chhungkua a ni a, chhungkua enkawlna mawhphurtu pawimawh ber chu nu an ni,” a ti.
MHIP Mamit Chhim Veng-in MHIP Day lawm chu Mamit bialtu MLA Er H Lalzirliana’n a hmanpui a. HPC Lunglei vice chairman Lawmawma Tochawng, MLA chuan MHIP Zobawk Vengchhak Branch MHIP in sak thar hawngin Day a hmanpui. MHIP ITI Branch chu Aizawl South-II bialtu MLA Lalchhuanthanga’n hmanpuiin lengkhawm zai intihsiak, hriselna lam hawi awareness, kum upa thilpek hlan, malzai leh Siktuithiang lama hun hman a ni. Aizawl West III bialtu MLA VL Zaithanzama’n MHIP Khatla Branch a hmanpui
MHIP Ramhlun South Branch hmanpuitu Aizawl North II bialtu MLA Dr Vanlalthlana chuan Mizoramah hmeichhiaten nasa takin hma an sawn a, sawrkar pawhin dinhmun tha takah a hlangkai mek zel a, chu chu Kristianna in a rah chhuah a ni, tiin, “Hma-sawnna in min nek velna karah nuhote in inrintawn a, in infuih thar a, in intihchak tawn a ngai. Chhungkaw nu in ni a, chhungkuaa in mawh phurhna san zia hre thar ang u. Kan pasal fanaute hmakhua hi kan kutah a awm a, thutha hi kan chhungkuaah kan sawi tam a ngai,” a ti.