Khawzawl leh Champhai Police tangdun chuan Champhai atanga Aizawl pan lirthei atangin ruihna atana hman thin methamphetamine kg. 115 chuang an man. Mizoramah tum khata meth’ an man tem ber tum nia hriat a ni.
Thudawn danin, Champhai Police chuan an thudawn bawhzuiin Khankawn Police checkgate-ah Bolero MZ-06 1517 chu an lo endik a, ruihhlo lam phurh engmah hmuhchhuah an nei lo. An ngaih tha lo chuan Khawzawl Police an hrilh a, an ni hian Khawzawl Lungvar Veng, JNV pengah Bolero hi nangchingin methamphetamine a phurh hi an man ta a ni. He lirthei khalhtu Lalrintluanga (50), Champhai Vengsang inti pawh man nghal a ni.
Police hotute sawi danin, methamphetamine an man hi kg. 115.55 a ni a, a vaiin pack 106 niin, pack khatah hian mum 10100 zel a awm a, a vaiin mum 170600 a ni. Mizoramah tum khata meth’ man tam ber nia hriat a ni.
The Aizawl Post-in a lo zawhkual tawh thinnaah methamphetamine hi Mizoramah tak chuan hman a ni lem lo nia hriat a ni. Police, Excise & Narcotics leh Central YMA hnuaia ruihhlo dotu lam pawhin Mizoram chhungah he damdawi rui hi sawitham an awm an hre loa, hmundanga zawrh turin a kalkawngah erawh Mizoram hi a tang nia ngaih a ni.
Meth kg.115 chuang an man
Get real time updates directly on you device, subscribe now.
Prev Post