MFA 2025-ah Bawrdar Kartel a langsar

Mizo Film Award 2025 chu November ni 28 zan khan Dawrpui Multipurpose Center-ah sem a ni ta a, Bawrdar Kartel-in award pathum dawngin a langsar viau a, ‘Darchhingpuii’ film pawhin award pathum a dawng a, ‘Mawla Loves Mawli’ pawhin award pahnih a dawng bawk.
‘Bawrdar Kartel’ hian Best Film bakah Best New Actor leh Best Director a dawng, ‘Darchhingpuii’ pawhin Best Supporting Actor leh Best Supporting Actress bakah People’s Choice Award a dawng bawk.
Thih leh Dam II film avanga Best Actor dawngtu Gilbert Colney chuan a award dawn chu amah support-tu a chhungten an hnena a lawmthu sawina anga pawm sak tura ngenin, “Ka chhungte, ka nu leh ka pa, ka unaute zawng zawng zin sanin, chhungkaw hna pawh thawk hman loin film ka rawn chang thin a, hei hi lawmthu sawi nan ka chungten min pawmsak turin ka ngen che u,” a ti. Gilbert hian Thih leh Dam II film siamtu leh he film-a a thawhpui te zawng zawng hnenah lawmthu a sawi bawk.
Host-in best actor nominee dangte stage-ah kochhuakin, Gilbert chu an duh ang taka chawimawina hun a siamsak a, nominee dangten Gilbert hi an lawmpui zia lantir nan stage-ah an zawn ta a ni.
Best Actress Award dawngtu Rosy chuan phu lo a intih thu sawiin, a dinhmun hruaithlengtu Pathian hnenah lawmthu a sawi a, film siamtu ten leh film-a a thawhpuite chungah lawmthu a sawi a, film industry a luh tan tirh atanga a thawhpui zawng zawng avanga hetiang dinhmun thlengthei a nih avangin an chungah lawmthu a sawi a, amah support-tu a chhungte leh a thiante, an khua, Siaha mipui te chungah lawmthu a sawi bawk.
Lawmthu a sawi zawhah host-in best actress nominee dangte stage-ah ko chhuakin, 2024-a he award dawngtu Sangsangi hnenah eng nge sawi tur a neih tiin, Rosy a zawt a, Rosy chuan, “Ka va phu lo ve, hei chu i ta tur asin,” a ti a. Sangsangi’n, “Ka rawn la let dawn,” tiin a lo chhang fiamthu a, MS-i’n “Ka rawn chuhpui dawn ,” a ti ve bawk a, boruak an siam hle a ni.
Mizo film industry hmasawnna rah leh than nasat dan pawh he award ceremony atang hian a hmuh theih. Entertainment Society of Mizoram buatsaih he award semnaah hian Mizo filmstar rual an pungkhawm a, a kum telin filmstar ten ngaihhlut leh lawm an hlawh telh telh a ni.
Mizo film te online-a man chawia en theihna streaming platform kan neih tak hnuah film siamtute leh lemchan lama tuite pawh an phur thar zel a, Mizo film industry pawhin hmuh theihin hma a sawn a, film siam leh film-a chan te pawh tunhma ai chuan awmzia a awm ta zawk a, eizawn nana hman tlak a ni ve tan ta tak tak a ni.
Mizo Film Award 2025 dawngtute chu:
Best Film – Bawrdar Kartel
Best Actor – Gilbert Colney (Thih leh Dam II)
Best Actress – Rosy Lalramthlengi (Mawla Loves Mawli)
Best New Actor in a Leading Role – Laraw Colney (Bawrdar Kartel)
Best New Actress in a Leading Role – RC Khiangte (Darchhingpuii)
Best Supporting Actor – Duhawma (Darchhingpuii)
Best Supporting Actress – Hlui Sailo (Darthlalang)
Best Director – Johnu Zote (Bawrdar Kartel)
Best Screenwriter – Samuel L Pachuau (Ka Nupui Chu Rukru)
Best Original Soundtrack – Ka Nghak Che- Guru Gee (Zamzami Pa)
Best Cinematographer – Mapuia Chongthu & Isaac Lalchhanpuia (Mawla Loves Mawli)
Best Costume – Hmakhawsang
People’s Choice Award – Darchhingpuii