Mizoram an chak zawn

BCCI hnuaia T20 inelna, Syed Mustaq Ali Trophy Plate chu November 30, Pathianni khan match thumna khelh a ni a, Mizoram-in run 29 in Manipur a hneh.
MCA Cricket Stadium, Pune-a inkhelah hian Mizoram Toss-ah chakin vuak hmasak an thlang a, over 20 chhungin run 186 siamin wicket thum an hloh. Mizoram tan Karthik CA (Outstation) chuan run ball 39 a hmachhawn atangin run 64 ngawt a siam a, a chetha hle. Captain Joseph Lalthankhuma pawhin out lovin run 47 a siam a, Jehu Anderson-a’n run 31 a siam bakah Johan Lalbiakkima’n run 16 a siam a, KC Cariappa-an run 19 a siam ve bawk.
2nd Innings-ah Manipur lamin over 20 chhungin run 157 an siam a, wicket 7 an hloh. KC Cariappa leh B. Lalnunfela te’n wicket 2 ve ve lain TC Vanlalremruata, Sumit Lama leh Karthik CA te’n wicket 1 theuh an la bawk. An target umphak tum viau mah an hlawhtling zo lova, Mizoram lakah run 29 in an tlawm zui ta a ni.
Inelna neih mekah Mizoram hian game thum khelh tawhin vawi hnih an chak a, tlawm zawkah vawi khat an tang tawh. Group champion ni thei turin run rate an neih that a ngai a, team dang result-ah an innghah a ngai tel bawk. Mizoram hian December ni 2 hian Arunachal Pradesh an hmachhawn zui leh ang.