MGNREGS hnuaiah tha zawka hmalakna tur duang

MGNREGS hnuaia hmalakna thar ‘Project Rotling – Hmasawnna Rahbi Thar’ chu Rural Development minister Prof. Lalnilawma’n Ningani khan a tlangzarh. Hemi rual hian he project vilzuina tur portal leh MzSRLM hnuaia self help group-te hlawhtlinna lehkhabu a tlangzarh bawk.
He project hi awm lo ata rawn awm thar niloin, awmsa ata mumal leh tangkai zawka hmalakna tur a ni tih minister hian a sawi a. MGNREGS hnuaia hmalakna kal mek bakah tha lehzuala danglamna thlen tura ke penna a ni tih a sawi. Hun tlemte chauh pek an nih laia project tha tak tak a lut thei chu official-te theihna leh thiamna a pho chhuak hle tih sawiin, thawhhona tha hnuaia hlawhtling tur a ni a, department hrang hrang atanga official-te pawh an tel ve theihna project-ah chuan phur leh thatho taka tel turin a sawm a ni.
‘Project Rotling – Hmasawnna Rahbi Thar’ hi Mizorama RD Block 28 inelna a ni a. He project hnuaiah hian short term project (kum 1 chhunga thawh zawh tur), medium term project (kum 2/3 chhunga zawh tur) leh long term project (kum 5 chhunga zawh tur) a ni. RD Block 28 atangin concept paper 84 a lut a, hengte hi district tinah a bialtu project director-ten an endik hnuah state level expert panel in project 27 an thlang chhuak a, heta tang hian RD minister kaihhruai State-Level Monitoring Committee-in project 15-ah a thlifim a ni.