MHIP Day vawi 50-na hmang dawn Mizo hmeichhia tan kan ding zel ang – MHIP president

Vawiin, July 6 hi Mizo Hmeichhe Insuihkhawm Pawl (MHIP) din champha vawi 50-na a ni a, Golden Jubilee hi MHIP branch hrang hrangah lawm niin, nimin lama lawm an awm bawk.
MHIP Day pual hian MHIP Gen. Hqrs. president Ngurmawii Sailo chuan thuchah a siam a. Tlang hrang hranga MHIP member-te chibai a buk a, MHIP dintu hruaitu leh member hmasa, MHIP kaltlanga ram leh hnam tana thawk leh sulsutute an hrereng tih a sawi.
MHIP chu Mizo hmeichhiate tana din a nih angin, kum tling lo pawngsual tawk, sawisak hlum, nau nei ngaihsak hlawh loh avanga nun chan, social media-a hmeichhiate tihmualphoa an awmte in, an thlavang hauhin sawkarah tanpuina an ngensak a. Chu mai bakah, ni sensa leh a thim a var thlu loa chhuak khawma aurualin, kawng zawhin Mizo hmeichhiate tan an bei thin tih a sawi.
“Kan fate, thangtharte tana tha lo tur vengin ualau taka sex hman leh a kaihhnawih thehdarhna social media platform-a titawp turin kan bei a. Vaihlo atanga thilsiam, kan tu leh fate chhan nan, dap chhuaha, tihral leh a that loh zia inhrilhhriain, a hun ang zela khawtlanga sualna do nan ‘kumpuan’ siamin kan thawk ho thin. Chhungkaw pangngaiah him tak leh thlamuang takin awm mah ila, kan member-pui, heng harsatna tawk, sawnpai avanga hnathawhna atanga ban, an pasalten an uiresan, sumdawn nana an lo hralh thin leh kawng hrang hranga harsatna tawkte tana beiin, chhanchuah hna kan thawk thin,” MHIP president hian a ti.
Hmeichhiaten inven dan an thiam theih nan, hmeichhe hamthatna tura sawrkar danpui siam zirna hun an huaihawt thin bakah hmeichhe police din tura an ngen thu te, hlamzuih sawngbawl danah a hringtunu tan a nat em avangin thlak danglam an ngen thu te, mi chanhaite chhiat ni (kangmei, leimin, accident, raltlan) leh thatni ah MHIP-in vawi tam an nu leh pa aiawh an tuamhlawm thin thu a sawi.
Sawrkarin hmeichhiate tana an thawh dan hria in, kawng hrang hrangah dah pawimawh leh hamthatna a siamsak dan MHIP hruaitu hian a sawi a. MHIP Golden Jubilee-ah an tu leh fa chhuanawm tak takte hnenah MHIP hmingin lawmthu an sawi tih a sawi. Rahbi tleu, ruihhlo ngai leh sual kawng zawh mekte pawh beidawng loin, anmahni tan veng tin leh khaw tinah MHIP an awm tih sawiin, “Kan hnenah lo tlu lut rawh u,” Ngurmawii Sailo hian a ti.
MHIP hi 1974 July 6 khan ‘Mizoram Hmeichhe Insuihkhawm Pawl’ tia din a ni a. Rampawna Mizo awmte huam tawk lo deuha hriatna avangin kum 1998 khan ‘Mizo Hmeichhe Insuihkhawm Pawl’ tia thlak a ni.