Mi aia danglam turin party mite chah

Mi aia danglam turin party mite chah
An party mite chu taima a, rinawm a, mi aia danglam turin Congress president Lalsawta chuan a chah.
Zirtawpnia Serlui Block Congress Committee Conference 2023, Vairengte-a neih a hmanpuinaah MPCC president chuan, mipui tana lem nuam leh kawng awlsam a tiam ve thei lo a. Rim taka thawka mahni thawhchhuah eia in in, hnam taima ni turin a duh tih an party mite a chah. “Kuthnathawktu mi taima leh thawkrimte dinchhuahna ram din ka tum a. Thuthluanga awma duhsak nghak turin engmah ka tiam ve thei lo che u. In tan ding nghet ula, rinawm ula, taima rawh u. Mi tih ang pangngai kan tih ve ringawt hian dam khawchhuahna a awm lo. Mi aia kan danglam ngam zel a ngai,” a ti.
Retheihna sal atanga chhuak turin thawhchhuah a ngai a, dinchhuah tum, mahni inchhanchhuah tumte tan ‘Tang Puihna’ an pe dawn tih Lalsawta hian a sawi. “Retheihna in a sal beh, an retheihna remchanga hmanga vau beh leh rilru him pawh pu thei loa sawithaih tawkte tan Congress party-in zalenna dar kan vua a ni,” a ti.
Serlui bialah Congress thlipui a tleh nia sawiin, India ram state lian Karnataka leh Madhya Pradesh ah Congress a sawrkar ngei dawn tih a sawi a. Kum 2024-a Lok Sabha inthlanpui neih turah India ramah Congress kaihhruai sawrkar a piang dawn tih a sawi a ni.