Mi rilru tina thei zawnga thu post bansan a hun tawh – ICT minister

Social media lamah thudik lo emaw thudik emaw pawh nise, mi rilru tina thei zawnga thu post leh thehdarh chu bansan a hun tawh takzet tih Information & Communication Technology minister Robert Romawia Royte chuan a sawi.
Aizawl East-II bialtu MLA, minister Robert Romawia Royte hian Thawhlehni khan a bial atanga kumin HSLC leh HSSLC Exam-a pass-te lawmpuina a buatsaih sak a. Hetah hian social media hman danah Mizote inzirthar kan ngai hle nia a hriat thu sawiin, thudik lo leh a chhe zawng, mi rilru tina thei zawnga thu post leh thehdarh chu bansan a hun tawh takzet tih a sawi. Zirlaite pawh puitling kawng zawh mek an nih angin, social media hman danah fimkhur turin a chah a, mimal leh vantlang rilru tina thei zawnga thu thehdarh lo turin a fuih. “Thudik pawh nise, mi rilru tina thei zawng a nih chuan social media-a thehdarh lo hram turin mipui ka ngen a. IT Act leh Cyber Crime chungchangah zirtirna tha kan ngai hle a, sawrkar pawhin helamah hian hma a la a, inzirtirna pawh kalpui mek zel a ni,” a ti.
Matric pass chuan nun kawng pengthuam pawimawh takah mihring a hlangkai a, eng kawng nge kan zawh zel dawn tih thlang thei dinhmunah kan awm tih inhria a, ngaihtuahna fim tak hmang turin HSLC pass tharte a chah. Class 12 pass te pawh college lamah nun thar zir turin an kai dawn tih sawiin, bul tan that chu a zahve zo a nih ang takin, tha taka bul tan turin zirlaite a fuih.
School Education director Lalsangliana chuan he hun hi hmanpuiin thu a sawi ve bawk.
Report-a a lan danin, Aizawl East II biala zirna kaihhnawih – HSLC & HSSLC pass lawmpuina, zirna in thawmthatna leh tihchangtlunna, zirtirtu leh thawktu rawihna bakah sum lama harsate tanpuina’n MLA Fund (2019- 2023) atangin Rs. 64,24,500 hman a ni tawh a. He bial chhungah hian high school 8 awmin, HSLC Exam 2023 ah chawhrualin zaa 92 an pass a, zaa za pass school pathum an awm. Higher secondary school 4 awmte pass percentage chu zaa 84.4 niin, zaa za pass school pakhat chiah a awm.
HSSLC Arts stream a Mizoram puma 2-na leh Public Administration-a subject topper ni bawk Lalawmpuii, Armed Veng South; Arts stream-a 6-na Mira Sairinmawii, Dawrpui leh R Lallawmsanga, Saron Veng te chu he bial atanga top 10-a lang niin, F.Lalthanmawia, Chite Veng chu Geology subject-ah topper a ni tih sawi a ni bawk.
HSLC leh HSSLC a top 10-te hnenah laptop, subject topper hnenah smart phone, distinction-a pass te hnenah sumfai Rs. 5000 leh hlawhtlinna chang zawng zawngte hnenah lawmpuina thilpek hlan a ni. Aizawl East II chhunga YMA Branch paruk hnenah ruihhlo dona leh zirna chawikanna turin MLA Fund atangin cheng nuai 1 theuh pek a ni bawk.