Midangte puih kawnga inhmangten World Humanitarian Day an hmang

Zoram Entu Pawl huaihawtin Nilaini khan Aizawlah World Humanitarian Day hman a ni a. Kumin thupui – “Khawvela inpumkhatna tih chak leh midangte tanpui kawnga khawtlang hmasawnna ngaihpawimawh bik” tih hmangin, midang puih kawnga inhmangte hlutna leh ropuina, midang puih kawngah khawvel pum inpumkhatna leh hmun hrang hrang amite thawhhona pawimawh zia sawi a ni.
Hmanpuitu state commissioner for Persons’ with Disabilities Vanlaldiki Sailo chuan, Zoram Entu Pawl-in rualbanlote puih kawnga hma an lakna lawmawm a tih thu a sawi a. Mizoram district 11-a Accessibility Audit an neih tawhnaah a tlangpui thuin vantlang hmun, a bikin damdawi in, biak in, hotel leh pisa thenkhatah rualbanlote tana awlsamna turin hmun thenkhatah hma lak ni tawh mah se, zaa 90 erawh rualbanlote tan a la awlsam lo tih a sawi.
“Mitinin kan hriat tur chu, vantlang kalkhawmna hmuna hun kan hmannaah fiamthu thawhnan rualbanlote tih dan kan zir mai mai tur a ni lo. Rualbanlote venhim leh an dikna chanvo humhalh sak hi ‘Rights of PwD Act 2016’ chuan a ngaipawimawh em em a. Chhaih nawmnaha an tih dan zir hi a phal loa, hremna pawh a khauh lehzual tawh avangin rualbanlote kan en danah fimkhur lehzual a tul,” a ti.
Pawl hrang hrang – Central YMA, MHIP, SELCO Foundation, ADRA, JRS leh MDPO atangin Mizorama tanpui ngaite tanpui kawnga hma an lak dan an sawi a. Panel discussion neih chhunzawm niin, Mizorama tanpui ngai, harsatna neite mamawh ber enge, rikrum thila rualbanlote harsatna tawh, khuarel chhiatna thlen thuta puih ngai bikte puih kawngah humanitarian worker-ten enge an zirchhuah, tih leh, sawrkar leh humanitarian worker tanghoin engtin nge rualbanlote tel theihna turin hma am lak theih ang, tih sawiho a ni.