Mihringah Vawk kal hlawhtling takin thlak

NYU Langone Health te chuan hlawhtling takin vawk kal (kidney) chu mihringah an thlak thu an sawi a. Mihringa an thlak hi thluak thi tawh (brain dead) a ni thung a. Doctor te chuan an hlawhtlinna chuan animal-human transplant kawng a hawng an ti.
Doctor te chuan he vawk kal an thlak hi genetic tihdanglam niin mihringa vuahsak a nih hnu ni 32 ah pawh mihring chu a la dam reng thu NYU Langone Health te chuan an tarlang a.
July 24, 2023 khan Robert Montgomery, professor leh chair of the Department of Surgery, NYU Langone Health leh director of the NYU Langone Transplant Institute ni bawk kaihhruaina hnuaia neih a ni a. Montgomerry chuan an kal thlak chu thlakhat liam tawh hnuah tha taka a la kal reng thu sawiin thla hnih chhung uluk taka an enfiah reng tur thu a sawi.
“Thla khat a nih hnuah kidney biopsy leh kidney test te neih niin engmah harsatna a awm lo a ni” tiin Dr Montgomerry chuan a sawi a. “Vawk kal hian mihring kalin a tih ang thil pawimawh engkim a ti vekin a lang a ni,” tiin a sawi bawk.
Dr Adam Griesemer, transplant surgeon, NYU Langone Health pawhin thymus pawh an transplant thu sawiin kal pawn lam hnuaiah dahin a chhan pawh kal thlak chu human immune system-in a beihna laka vengtu tur a nih thu a sawi bawk a.
“Thymus gland hi kan nghawng leh awm kan immune system te awmna leh kan taksaa protein awmte eng nge an nih hriaa kan taksaa awm lo turte hnawltu a ni” tiin Dr Griesermer chuan a sawi a. “Hei vang hian vawk atanga thymus transplant chuan a dawngtu taksaah cell thar siam remtiin vawk antigens te chu pawmin chu chuan immune response awm thei tihniamin hnawl a nih theihna tur a titlem zual a ni” tiin a sawi bawk.
Vawk kala thlak hi kum 57-a upa Maurice Miller lakah neih a ni a, a unaunu Mary-Miller Duff chuan a unaupa chuan sawi thei se chuan a inchhuang ngawt ang, a ti a.
“Mo tiin kan ko thin a, unauna ngilnei leh midang puih duhna rilru pu reng a ni” tiin Miller-Duff chuan a sawi a. “A hun tawp dawn lamah innovative medical advancement hmanga midang tam tak a pui dawn a ni,” tiin a sawi bawk.