Milan Champions League beiseina derthawng

Milan Champions League beiseina derthawng
Top flight-a inham-tan hram tuma tan khawh mek Spezia chuan Przemyslaw Wis-niewski leh Salvatore Esposito goal thun hmanga AC Milan laka 2-0 hnehna changin Serie A table-a pangana luahtu Stefano Pioli team-in point li ngawtin an chung chiaha palina luahtu Lazio an thlau ta a, season thara Cham-pions League football khelh phak beiseina a tlahniam ta hle.
Karliamta mai Uefa Champions League semi-final first leg-ah Milan hian derby match-ah sihnih fai bawkin an elpui lian Inter Milan an hneh lo hlimhlawt kha a ni a, kartawp league match lamah insiamtha zo lo lehin, Thawhlehni zan Champions League second leg atan pawh inrintawkna nei chau hle tura ngaih an ni!
Table-a 18-na luahtu Spezia mualah Milan tan Sandro Tonali leh Brahim Diaz-te’n goal ban an fuh ve ve a, an hun tha neih an hloh hnu minute 75-ah Wis-niewski chuan home team hmahruaina a thun a, minute 10 an khel tling leh tihah Esposito goal hmuh tur a awm zui leh a, kum 2017 hnu lama a vawikhatna atan bottom three club lakah AC Milan an tlawm a; an kawtkaia an point thum hlawhchhuah hmangin Spezia chuan table-a an chung chiaha 17-na luahtu Verona chu point-ah an nihrual a, goal difference hmangin an hniam zawk thung.
Naktuk zan second leg-a thenawm team an hmachhawn tur chung-chang sawiin Pioli chuan, “Kan rilruah Champions League a lian lo thei lo a, first leg-a kan result-in min tihlunghnur pawh kha dan pangngai ve reng a ni.
“Tualchhung leh Champions League-ah kan season a la zo lo a, he tlawmna hian kan hma hun a tichiri ta tlat a, season kal laia a eng lam hawi lui chiam turin game khelh tur kan ngah tawh lo. Thawhlehni hi kan tan hun remchang ani thei a, Inter kan hneh thei tih hi kan rin tlat a ngai,” tiin a naute a fuih.
Inrinni Serie A inkhel dangah Inter Milan chuan 4-2-a an mikhual Sa-ssuolo hnehin table-ah pathumna an luahkir a, point ngain an hnuaia awm Milan an kalsan.
Inter goal hmahruai hi first half-a Romelu Lukaku tihluh niin, a hnuah Ruan Tressoldi own goal-in a zui a, Lautaro Martinez chuan Inter goal thumna thawhin, Matheus Henrique leh Davide Frattesi-te’n Sassuolo kirleh beiseina tinungin mikhual siphurh pahnih sut then bawk mah se hun tawp dawnah Lukaku bawkin chiang zawka San Siro luahtute chakna goal a thawh leh.