PSG chak zanah Messi an boo khum

PSG chak zanah Messi an boo khum
Kylian Mbappe goal hnih thun zanah Paris St-Germain chuan Inrinni khan 5-0-in Parc des Princes-a an mikhual AC Ajaccio an sawp a, goal khung ve lo Lionel Messi chu Paris mipuiin an ‘boo’ khum hluah hluah!
Club thuneitute phalna la hmasa loin Argentina captain hi thuk taka an sawizawm tak Saudi Arabia ramah a nupui fanaute hruaiin a zin a, club training a bawhpelh bawk a, PSG chuan an superstar hi inkhel thei lo leh training zawm thei loin an hrem ren rawn a, Inrinni kha hremna tuar zoa khelmual a luh leh vawikhatna niin, season tawp ruala chhuak tawh tura ngaih ngheh hi Paris mipui chuan dim lo taka thawm chhuahin an diriam zui ta a ni.
Tarlan tak angin, he inkhela goal hnih hi second half tir lama inhnaih taka Mbappe thun niin, ti hian, a career-a a vawilina atan Ligue 1 season khatah goal 25 a thun tling a, Thadee Cisowski Indopui Pahnihna hnu lamah Thadee Cisowski tih loha chuti ang ti leh thei French player hmasaber a ni.
Ligue 1 hmahruaitu team tan Fabian Ruiz chuan minute 22-ah goal hmahruai thawhin, minute 33-ah mualneitu team goal hniha khungtu Achraf Hakimi chu minute 77-ah hnawtchhuah a ni a; minute 80-ah Hakimi laka kut a thawh avangin Ajaccio player Thomas Mangani pawh red card hmanga hnawhbo a ni a, player 10 ve vein team pahnihin a tawp an khar.
Season thara division hniam lama khel tur Ajaccio player Mohamed Youssouf chuan minute 73-ah ‘own goal’ thunin, mikhual team ‘chance’ tha ber chu minute 67-a Mickael Barreto ke dinglam hrinchhuah a ni a, mahse, box pawn chiah atanga a chhuih chu goal kham chungah a thlawkchhuak.
Messi chuan minute 90 chhung khel tluan bawk mah se goal a khung zo lo a, assist pawh a siamchhuak zo lo.
Christophe Galtier-a team PSG champion zing record an kawl lai belhchhaha French title 11 la tling turin point li chiah an mamawh tawh a, tun dinhmun, khelh thum la awmah point rukin Ligue 1 table-a anmahni hnaihbertu Lens nen point rukin an inthlau
Inrinni French Ligue 1 inkhel dangah Strasbourg chuan sihnih faiin an mikhual Nice an hneh ve bawk.