Inrinni zan San Siro inkhela goal lut awmchhun chu kha Serie A match-a home chang zawk Inter Milan chanpual niin, Milan derby-a 1-0 hnehna lawm Inter hi Inrinni inkhel danga sithum faia Spezia hneh chunga an hmahruaina sawhnghet zel Napoli lakah point 13 bawkin an hnufual chhunzawm.
-- Advertisement --
Milan derby-a goal lut awmchhun hi first half minute 34-a Lautaro Martinez tihluh niin, derby goal sarih a thunna chiah a ni a, ani aia Inter tana derby goal bik khung hnem awmchhun chu Giuseppe Meazza (12) leh Istvan Nyers (11)-te chiah an ni.
Captain Martinez hian Milan midfielder hlui Hakan Calhanoglu ‘corner’ pet chu goal-ah chantirin, hun tawp dawn hnaihah goal hnih khungbelh bawk mah se pawmsak a ni lo ve ve.
Pakhat zawk substitute Romelu Lukaku goal tur chu Malick Thiaw laka a ‘foul’ avangin hnawl a ni a; Martinez-a goal hnihna tur pawh offside vangin pawmsak a ni lo.
Ball chhawpsaktu Lukaku tauhpial zeuh laia offside Argentina striker Martinez-a goal VAR kaltlanga enfiah a nih chhung hi a rei fu a, video assistant referee thutlukna an nghah vang vang hnuah offside-a ham a ni.
Serie A table-a paruknaa chhuk ta Milan hi inelna hrang hranga an game khelh hnuhnung vawirukah vawinga tehreng an tlawm tling a; Pathianni Milan derby-ah pawh khan Stefano Pioli team hi chak thei tur awm-angin an inlan lo ve leh hrim hrim a, minute 75-a Inter keeper Andre Onana paltlang zo loa midfielder Brahim Diaz-a pet kha Milan-in goal zawna ball an thawnluh hmasakberna a ni leih leih chauh!
Pathianni Italian Serie A inkhel dangah sithum faia Spezia hnehtu Napoli tan Georgia winger Khvicha Kvaratskhelia chuan penalty atanga goal khat chhuilutin, Nigeria striker Victor Osimhen chuan goal hnih a thawh thung a, Naples khaw team hian title race-ah hma an hruai fal chhunzawm zel.