Milan tana khel tur Ibrahimovic-a fapa

Zlatan Ibrahimovi-a fapa Maximilian Ibrahimovic pawhin ei a tling chho ve tan dawn a, tunhnai khan a pa club hlui AC Milan chuan inremna an ziahpui a, hei hi a football zinkawnga professional contract a ziah vawikhatna a ni.
Rawlthar kum 17-a upa Maximilian hian season tharah pawh Milan first team tan a la inlan hmel loh a, a pa hnung zui tura a inbuatsaih mekna kawngah Milan youth team tan a khelh leh rih phawt a rinawm.
Barcelona, Paris St-Germain leh Manchester United tan pawha lo khel tawh Ibrahimovic khan nikum maiah football khelh a chawlhsan thu puangin, San Siro club behchhana a career a zialfel hnuah tunah hian AC Milan advisor hna a chelh mek a ni.
|um hnih zawma Milan a zawm chhung khan game 163 khelin goal 93 a thunsak tling a; kum 2011 leh 2022 khan AC Milan chu Serie A title a lakpui.
Sweden international Ibrahimovic hian a career-ah belhkhawmin club goal 511 a tilut tling a, trophy 34 a lak zinga 12 chu league title a ni nghe nghe.
Kum zabi liamtaa a career bul tan hman Ibra hi a fei hle a, forward ni chunga chawl har berte zingah telin, tunah hian kum 42 a tling tawh a, Ballon d’Or chawimawina dawng ta chiah lo mah se nominee chu tum 11 zet a ni hman!
He striker palian hi an ram tana goal khung hnem ber niin, Sweden tana match 122 a khelhah goal 62 a thun tling.
Trophy heti zat a lak zingah hian major club trophy langsarber tih theih Champions League trophy a tel tlat a, European title a lak awmchhun chu kum 2017 Europa League-a Manchester United a champion-pui kha a ni.