Miley Cyrus ‘Flowers’ a Hot thar leh

Miley Cyrus ‘Flowers’ a Hot thar leh
Miley Cyrus hla hit ‘Flowers’ chu Billboard Hot 100 (singles) chart-ah a No.1 a, he chart-ah hian a zawn ni kher lovin kar sarih a No.1 tling ta. Hetihrual hian Rema & Selena Gomez ‘Calm Down’ pawh chart top 10-ah a debut e.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Miley ‘Flowers’ hi kar ruk chhung a zawna chart No.1 a nih hnuah kar hnih chhung No.2 a ni leh a, tunah hian No.1-ah bawk a rawn kir leh ta a ni. He hla hi a album thar ‘Endless Summer Vacation’-ah a dah tel a, a album pawh hi Billboard 200 (albums) chart No.3-ah a debut a, 2006 atangin chart top 10 kai thei album 14 a neihna a ni nghe nghe.
Flowers hian kar khat chhungin radio airplay-ah ngaithla maktaduai 106.7 nei angin an chhut a, stream maktaduai 28.2 leh sales 15,000 a tling a, hei hi chart-ah a No.1 pui leh ta a ni.
Kar kalta chart No.1 Morgan Wallen ‘Last Night’ chu stream maktaduai 39.9, radio airplay maktaduai 14.5 leh sales 12,000 tlingin No.1 atangin No.2-ah a tawlh a, SZA ‘Kill Bill’ chu No.3-ah bawk awm lehin, chart No.1 hlui The Weeknd leh Ariana Grande ‘Die for You’ pawh No.4-ah bawk a la awm a, Metro Boomin, The Weeknd leh 21 Savage ‘Creepin’ chu No.6 atangin No.5-ah a insawn thar leh a. PinkPantheress leh Ice Spice ‘Boy’s a Liar Pt.2’ chu No.5 atangin No.6-ah a tawlh a, chart No.1 hlui Taylor Swift ‘Anti-Hero’ chu No.12 atangin No.7-ah a invawrh thar leh ta bawk.
Rema leh Selena Gomez ‘Calm Down’ chu stream maktaduai 14.9, radio airplay maktaduai 44.2 leh sales 5,000 tlingin, No.19 atangin No.8-ah a invawrh a, Nigeria chhul chhuak Rema (a hming tak Divine Ikubor) tan he chart top 10-a a lan vawi khatna a ni a, Gomez tan a pakuana a ni ve thung. He hla hi Rema hian February 2022-a a tlangzarh tawh niin, a debut solo album ‘Rave & Roses’ atanga a single a ni a, Gomez remix official video an tichhuah hnuah a lar thar leh ta a ni.
Morgan Wallen hla dang ‘Thought You Should Know’ chu No.7 atangin No.9-ah a tawlh a, a hla dang ‘You Proof’ chu No.8 atangin No.10-ah a tawlh ta bawk. Tunkar chart top 10-a Morgan Wallen hla pathum lang te hi a album thar ‘One Thing at a Time’ atanga single vek an ni.