MIMA-in Income Tax department atanga buaina tawk ho kokhawm

Income Tax department atanga lehkha dawngten an chhan dan tur a hnu zela lo hmachhawn dan tur inhrilhfiahin heng mite hi Inrinni khan Mizoram Merchant Association chuan a kokhawm.
MIMA hian Income Tax department North East Region-a hotupa ber, principal chief commissioner bakah chief commissioner leh hotu dangte an lo sawipui tawh bakah lehkha an thehlut a. Mizorama Income Tax Office-ah lengin an sawipui tawh bawk. Income Tax atanga lehkha hmute Silchar-a thawn ngai loa, lo chinfel saktu tur qualified officer pakhat pe turin an dil a. Income Tax hotute atang hian hma an laksak mek tih thu ziakin an dawng tih an inhrilh a ni.
Hun intham chhunga lehkha hmu an awm a nih chuan, document ngaite nen chhang zel turin an inhrilh a. A chhan dan tur hi heti lama mithiam, MIMA joint secretary Lalrammuana’n a video nen a zirtir nghal. Hetianga an chhan hnu pawh a, assessment year inang renga lehkha an la hmu zel a nih chuan MIMA-a report turin an inhrilh bawk.
‘Mizote tribal kan ni chunga Income Tax department-in lehkha min pek reng chungchangah sawrkar nen tanghoa, all NGO, all political party inhmukhawm a, lehkha siama hmalak dan ngaihtuah nise tih rel a ni a. Tun ang renga kan kal chuan Income Tax department hian min tibuai reng dawn a, sum sen lohna turah tam tak tak chartered accountant rawihna atan kan seng fo dawn a, hei vang hian sawihona ruahman huna lo inhawng turin sawrkar, all NGO leh all political party kan ngen a ni,’ MIMA chuan a ti.