Mimal anga midang bei nasa ber chu ZPM – R Lalzirliana

Party dang aia danglam ngam tura ngaih ZPM chu mimal anga midang bei nasa ber party an ni tih minister R Lalzirliana chuan a sawi.
Thawhtannia Mizo Hnam Run inkhawmah MNF adviser R Lalzirliana chuan ZMP chu a tha zawnga Zoram kaihruai ngam tur anga insawi, party dang zawng aia danglam ngam tura ngaih, Pathian pawh hnaih bik riau nia insawi thin an ni tih a sawi a. ZPM Val Upa Council (VUC) in VIP culture tihhniam te, MLA hlawh tihhniamte sawi ve thin mah se, tunah pawh ZPM MLA-te chu designation plate tar mawi ber berte an ni, tiin, “ZPM MLA-te hian tunah pawh VUC thu hi an zawm reng reng lo, opposition nih lai pawha an zawm lo a nih chuan engtikah mah an zawm lo ang tih ring rawh u. An hotupa ber, an thiampuipa Pu Duhoma danglam bikna hi politics-a pawl sawn tam bak hmuh tur a awm lo. ZPM chu mimal anga mi bei nasa ber party an ni,” a ti.
Power & Electricity minister chuan hrilen leh harsatna hrang hrang karah sawrkar anga hnathawh a harsat hle lai a, department hnathawh leh hmalakna hrang hrang an neih thu a sawi a. Aizawl khawpui chhunga electric hrui inzam nuai chu felfai taka ABC line-a thlak thuai a nih tur thu te, power-ah kan hnianghnar zawk theihna’n DPR hrang hrang an siam mek thu te a sawi a ni.