Min sawisel viau thin mah se Congress sawrkar min tluk lo – MPCC treasurer

Min sawisel viau thin mah se
Congress sawrkar min tluk lo
– MPCC treasurer
Congress party a sawrkar lai thlirletin, party dangin sawisel viau thin mah se, ram enkawl kawngah an tluk lo tih Congress treasurer Dr Lalmalsawma Nghaka chuan a sawi.
Sinlung Hills Council inthlan tura campaign MPCC hruaitu hian kan ram chu Congress party-in a enkawl loh chuan a tluchhe thin tih sawiin, “Congress hunlai kha thlirlet ang u, party dangin min sawisel viau thin mah se, min tluk lo. Sum renchem chungchangah Congress min entawn se kan duh hle,” a ti.
Congress sawrkar laiin vawiina Board awm leh thluah tawhte hi mipui sum tihektu a ni tih hriain huaisen takin an thiat ngam a. MNF a rawn sawrkar a, kha’ng Board kha an tharthawh a, party hotute leh candidate chang lo te intih lawmna atan an hmang a. Tuna sawrkarna siamtu ZPM an zualkai lehzual, tiin Dr Lalmalsawma hian a sawi.
“An party hotu lawkte thi inbeh tirin Board chairman leh member-ah an indah a, a theih ang angin an inthei sem a ni ta ber. Chumi chu duh tawk loin an hlawh a let tam takin an tipung bawk,” a ti.
Petrol leh diesel man tih san avangin thil man a to a, sumdawng tan pawh thil man tihsan a tul a, hei hi Mizoram mipui rawkna leh mirethei zawkte hmuhsitna a ni tih a sawi. Chhiah tihsan chungchangah Pu Lal Thanhawla kha a fimkhur hle tih sawiin, “Miretheiin an tuar ang, tih a hlau thin hle a, a tul fe loah chuan chhiah tihsan a ngaihtuah ngai lo,” MPCC treasurer hian a ti.
SHC inthlang tur bial hrang hrangah party dangin therhlo leh sum chakna hmangin an theih ang tawka mipui bum tumin an thlem mek niin a sawi. CM Special Package – rulh ngai lo loan an rawn zuar thar mek tih sawiin, rulh ngai lo tak tak tur a nih chuan ‘loan’ ti loin hming dang phuah mai se, rulh ngai lo chu loan a nih theih a rinawm loh tih a sawi.