Minister chawimawi vak ang chi kha kan duh ve lo – B Lalchhanzova

Sawrkar hmasate angin minister chawimawi leh inzawn ang chi kha an duh ve lo tih minister B Lalchhanzova chuan a sawi.
Aizawl East-II ZPM Zonu intuaitharna hun a hmanpuinaah bialtu MLA B Lalchhanzova chuan, mipuiin lal ni turin an thlang tling loa, rawngbawl hna thawk tura thlantlin an nih avangin, chief minister pawhin tlawm taka mipui rawngbawl turin a zirtir a, sawrkar hmasate hunlaia minister-te chawimawi vak vak ang chi, inzawn leh parthi inawrh tir vak ang chi kha an duh ve lo tih a sawi. “Ram hruaitu ropuite hi an hausakna leh an ropuina lam ai chuan, mipui tana an rawngbawlna leh inpekna hian mite hriatreng a hlawhtir zawk thin,” a ti.
Roreltu hmasaten sem policy, NLUP leh SEDP hmangin Zoram mipui min dawi nasa a, 2023 MLA inthlan campaign lai thleng khan sem policy an la tawktarh a; mipui kan harh tawh tih an hre lo tih a sawi.
“ZPM chuan mipui chhia leh tha hriatna tibuai thei zawnga campaign kan duh loa, kan tih ve theih tura kan ngaih thil tam tak pawh mipui hnenah kan tiam duh lo zawk. Mah se, kan sawrkar ve ta a, theihtawpin mipui hmasawnna tur hawiin hma kan la nghal a, ZPM sawrkarah hian mipui thla a muang takzet a ni,” a ti.
Roreltu hmasate avangin mipuiin politics kan thlir dan a dik lo tawh hle a, mi tha takte pawh politics-a an inhman chuan hmuh dan danglam tak kan nei tlat thin a. ZPM a sawrkar takah chuan kohhran mite pawhin politics chu ram rawngbawlna leh ram siamthat hna thawhna hmun tha tak a ni tih rinna an lo nei ta niin a sawi bawk.