Minister-in electric bill dan thar sawifiah
Minister-in electric bill dan thar sawifiah
Power & Electricity minister F Rodingliana chuan May atanga kalpui tan electric bill dan thar a sawifiah a. P&E department hnuaia hmasawnna, hmalakna thar, a bikin smart meter hman tur a sawifiah bawk.
Revamped Distribution Sector Scheme (RDSS) hnuaiah electric sem darh kawnga hmasawnna hna chi hrang hrang thawh mekin a kentel, electric bill siamna software thar chu Aizawl, Lunglei, Lawngtlai, Siaha, Serchhip, Champhai, Khawzawl, Saitual leh Kolasib-ah May 2025 atangin hman a ni tih minister hian a sawi a. He billing software tharin a kentel zingah Central Electricity Regulatory Commission duh dan zulzuia siam, Mizoram Electricity Supply Code Regulations 2013 sawi angin, tariff slab sang zawka bill chhut (calculate) loh tur a nih rualin, reading lak hun dik taka lak a nih loh vanga tariff slab sang zawka chhut (calculate) ngai thin tibo turin pro rata basis (daily basis) bill calculation chu software tharah hian hman a ni tih a sawi. Bill chhut (calculate) dan chipchiar zawka hre duh tan Electric department office-ah zawhfiah theih reng a ni tih a sawi bawk.
“He software thar hman tan avang hian bill la hmulo awm theih a ni a. Bill la hmu lo tan pawh computer atangin pedmconsumer.ugoerp.com/ ah leh mobile application atanga pedmconsumer application download theih niin, hetah hian bill pawh a pek nghal theih bakah chipchiar zawkin pdf format-a download theih a ni,” a ti.
RDSS scheme-ah hian kan eelctric meter hman lai chu smart meter-a thlak vek tur a ni tih F Rodingliana hian a sawi a. State danga kalpui tawh smart meter hmanga pre-paid system pawh kalpui ve tura hma lak mek a ni tih a sawi.
P&E secretary K Lalrinzuali chuan, an department hmalakna mipuiin an hriatfiah loh lai a awm theih thin avangin mipui hnenah tam zawka information pek chhuah a ni dawn tih a sawi a. Electric bill thar kalphung leh kalpui dan hi web-ah pedmconsumer.ugoerp.com/ leh mobile app-aah pedmconsumer atangin a hriatchian theih tih a sawi. P&E mobile app chu chhungkaw tinin an download chuan bill pek kawngah a awlsam phah hle dawn tih a sawi bawk.