Minister-in Health Clinic tlawh

Health & Family Welfare minister Lalrinpuii chuan Thawhlehni zing khan Durtlang Mel 5-a Health Clinic Centre, Selesih Anganwadi Centre leh Health Clinic hluihlawn tawh a tlawh.
Health minister hian ZPM sawrkar hnathawh tawh hrang hrang sawiin, an hmalakna kawng hrang hrangah hlawhtlinna hmel an hmu chu party mi leh ram mipui thlawp that vang a ni tih a sawi a. Inthlan dawna an auhla ang ngeiin, kuthnathawktute lam hawiin sawrkar a che nghal a, sawhthing avang ringawt pawhin chhungkaw tam takin kum danga an sum lakluh aia tam an lakluh tawh bakah damlote tana sawrkar hmalakna Mizoram Universal Healthcare Scheme chu mi tam takin an chhawr tawh a, Mizoram chhungah Day Care Center-te nen damdawi in 24-in MUHCS an zawm tawh a, Mizoram pawn state hrang hrang damdawi in 54-in zawm tawhin, deemed empanelled 12 an nei tawh tih a sawi a ni.
“Tunhmaa mitthi chhungte, khawtlang leh tlawmngai pawl hruaitute bakah MLA-te tana phurrit tak ni thin, mitthi ruang phurh pawh Mizoram sawrkarin buaipuiin tunah chuan ruang phurh man sawrkarin a pek sak ta vek a. Kalphung thar kan aupui hi a takin Zoram mipuiin kan hmang mek. Sawrkar damdawi in kan ti changtlung chho zel a, a bikin Mizorama sawrkar damdawi in lian pahnih – Civil Hospital Aizawl leh ZMC&H ah tunhmaa la awm ngai lo khawl thar changkang tak tak kan dah tawh a ni,” a ti.
Minister-in Anganwadi Centre leh Health Clinic a tlawhnaah hian thawktuten an harsatna an lo thlen a, sawrkarin a tih theih ang chu ngaihsaka bawhzui zel a tum tih a hrilh a ni.