Minister-in Khawzawl a tlawh

PWD minister Vanlalhlana chuan Inrinni khan PWD Khawzawl Division huamchhunga leimin hlauhawmna hmun, New Chalrangah silpaulin 40, thirzai kg.25 leh pliers a hlan.
Leimin hlauhawmna hmun hi Pradhan Mantri Gram Sadak Yojana-II scheme hnuaia Khawzawl- Biate Road laih vanga min hlauhawm a ni a; PMGSY scheme ah hian compensation component a awm loa, amaherawh chu department-in kawng laihna avanga leimin mai thei, mipui tana hlauhawm a nih avangin a remchan dan ngaituahsakin silpauline pek an ni.
PWD Khawzawl Division Complex chhunga auditorium sak mek chu a hmunah a enfiah nghal bawk.
Transport minister ni bawk Vanlalhlana hian District Transport Office (DTO) Khawzawl hmun tura bialtu MLA W. Chhuanawma leh district bawrhsap K Lalrohlua ten an lo ruahman, DC office Building hlui Khawzawl Darngawn Veng ami chu a tlawh bawk.
DC office building hlui chu chhuahsan tawh mah se, uluk taka enkawl zui a nih avangin tha a tih thu a sawi a. Minister hian DTO office-a thawktu tur lak tuma inruahman mek a nih thu pawh sawiin, remchang hmasa berah DTO Khawzawl chu function chhoh tir a ni dawn tih a sawi a ni.