Minister-in LAD hmunhma tlawh

Local Administration Department (LAD) minister C Lalsawivunga chuan Thawhtanni khan Champhai khawpui chhunga LAD office leh hmunhma tlawhin a enfiah.
Thawktute a kawmnaah LAD minister chuan office kalphung siamthat ngai leh aikal lak chungchangah sawrkarin theihtawp chhuaha hma a lak thu sawiin, sawrkar hmalakna tha taka thlawp turin a chah. Thawktu indaihlohna engemawchen phuhru turin sawrkarin a remchan dan ang zela hma a lak thu a sawi a. Department hmunhma tha tak takte tangkai zawka hman a nih theih nan inrawnkhawm chunga ngaihtuahna sen tlan a tul, tiin, infinchhuah tawn chung zela hma lak tlan a pawimawh tih a sawi a ni.
Champhai Kahrawt Venga LAD office tlawhin thawktute a kawm a. Office mamawh thlen pawh enfiahin a tul angte lo enzui a tum tih a hrilh a. Champhai Vengsang PHE Venga LAD ram chu tlawhin tangkai taka hman dan tur a sawipui. Hemi hnu hian New Champhaia VC Rest Housea tlawh a, tun aia changtlung zawka cheibawl leh tangkai taka hman dan tur enfiahin tul angte department hotute a sawipui a ni.
Art & Culture minister ni bawk C Lalsawivunga hian Thawhtanni zing khan Dungtlanga pipu sulhnu – Lianchhiari Lunglen Tlang leh Dungtlang khaw hmun hlui tlawhin humhalh kawnga hmalakna a enfiah a. Dungtlang khaw hmun hluia Art & Culture department hmalaknaa zirchianna, archaeological exploration & excavation kalpuinaa pawimawh leh tulte a enpui a ni.