Minister pahnih bang turin phut

Zoram People’s Movement party chuan minister pahnih – R Lalzirliana leh Robert Romawia Royte chu bang turin an phut.
ZPM hian Zirtawpni khan Directorate of Transport bulah sawrkar an duh khawp lohna lantirin punkhawm an huaihawt a, auhla chi hrang hrang hmangin an aurual.
ZPM working president K Sapdanga chuan ZPM Legislature Party leader-in a thu dawn sual chungchangah a dik lohna sawi mam tum loa huaisen taka Sports minister ngaihdam a dil ngam chu chhuanawm a tih thu a sawi.
Khaw tam takin phullem phahna khelmual an neih avangin mipui an lawm em em tih sawiin, consultancy firm-te leh contractor-te chu mipui aia lawm zawk an ni tih a sawi a. MNF sawrkar chuan hrilen lai pawhin phullem phah an thulh phah loh tih sawiin, “Infrastructure-ah hma kan sawn viau laiin, infiammite enkawlna lamah erawh sawrkar a hlawhchham hle,” a ti.
ZPM Political Affairs Committee member TBC Lalvenchhunga chuan, DC&MA minister Pu R Lalzirliana leh Sports minister Pu Robert Romawia Royte ten dan an bawhchhe ngei tih ZPM MLA Pu Lalduhoma’n House-ah a sawi tih sawiin, hmasawnna chhuanlama sumdawn nana sawrkara thuneihna hmangsual duhtute hi insawifiah turin an ngen tawh a, vawiin thlenga an insawifiahna an la hmuh loh avangin heng minister pahnih hi anmahni chhia leh tha hriatna hmanga bang mai turin thurawn an pe tih a sawi a ni.
Danin a ban kher an phut a nih pawhin, ZPM chuan hman a la chhunzawm zel dawn tih a sawi a. Hetianga minister pahnih an chet theih chhan hi chief minister-in a pawmpui a ni tih an pawm thu leh, tuna sawrkar mek chu rorelna chelh chhunzawm tlaka an ngaih loh thu sawiin, bang turin an phut tih a sawi.