Minister-te in chei nan nuai 110
PC Party chuan, minister leh minister tlukpuite in cheina atan mipui sum cheng nuai 110 lai hman a ni tiin nimin khan thuchhuah an siam a. Bungalow emaw quarters pawha cheng lo cabinet minister 5 leh minister of state 5 te in chei nan cheng nuai 110 hman a ni, an ti.
Tuna sawrkar mek hian, an sawrkar chuan leiba tam tak an chhawm dawn tih an hriat lawk avangin, an sawrkar hunah chuan inrenchemna an ngaih pawimawh tur thu an lo sawi lawk tawh thin a. Sawrkarna an han chan takah chuan ni za chhunga tihhlawhtlin turte pawh an puangzar nghal a. Chutah chuan inrenchem dan tur ngaihtuah turin Resource Mobilisation Committee din a nih tur thu sawi a ni a, a hnu lawkah he committee hi din a ni ta reng bawk a. Inrenchem chungchangah minister hovin hma an hruai dawn tih chief minister chuan a sawi a, MLA tana car thar lei tihtawp a nih tur thu leh amah pawhin motor thar a lei loh tur thu te pawh a sawi a. Lehkha phek lehlam hman tawh, a lehlam la awl si a hman thu te pawh a sawi mai ni lovin Assembly Session laiin House member-te hmuh turin a lek lang nghe nghe a nih kha. Hma pawh an la tha viau reng a ni.
Chutih laiin, ‘in chei nan nuai 110’ tih thawm hriat tur a lo awm leh ta a. Hei hi minister leh midangte pawh hian an lo entitle a nih pawhin, Inrenchemna na taka kalpui tum sawrkar tan chuan thil inhmeh lo tak a ni awm e. ‘Insawhngheh kum kan ti bawk a, helamah hi chuan insum rih deuh ang aw’ ti tura ngaih leh beisei an ni a. Kum hnih kum thum han vei se, tlema dinhmun a lo ziaawm deuh hun te pawh nghah awm tak a ni, tih ngaihdan a piang thei awm e. ‘A bul tan that hi a zatve zo tluk a ni’ tih thufing a awm a, sawrkar hian bul hi a tan tha lo palh mai ang tih a hlauhawm hle a ni.
Sawrkar kal tate pawh khan inrenchemna lam hawi chu an sawi ve vek mai, mahse an inren thiam chuang lo. Langsar takin ‘tui bottle tê’ hman tur tih a nih laiin, langsar lo lamah inrenchemna kalpui a ni leh si lo. Khatiang vel kha a ni a. Sawrkar thar lakah hian mipuiin beiseina sang tak an nei a, insawhngheh kumah hian an insawh thawl zawk mai ang tih a hlauhawm hle a ni.