Minister thar pathumin Aizawl Press Club tlawh

Zirtawpnia sawrkar thar lakluh hnu ah minister thar pathum – K Sapdanga, Lalnghinglova Hmar leh Dr Vanlalthlana te chuan Aizawl Press Club tlawhin Mizoram Journalists’ Association member-te nen an inkawm.
Home minister thar K Sapdanga leh Sports & Youth Services minister thar Lalnghinglova Hmar te hi MJA member ni lai an ni a, minister Dr Vanlalthlana hi Information & Public Relations changtu a ni bawk.
MJA Gen. Hqrs. president C Lalrambuatsaiha’n hun kaihhruaiin MJA president lo ni tawh K Sapdanga chuan media chu he hmun a thlenna kawng sialtu leh hlangkaitu a ni, tiin, he mawhphurhnaa namluttu chu media a nih angin MJA member-te chu amah tawiawma thlawp tur leh finchhuah turin a sawm.
A vei thenkhat sawilangin, Mizoram luhna ramri ah receipt tel lo sum chevel a tam hle nia sawi chu ngaimawhawm a tih thu a sawi a. “Chhiah lakna tur chu a awm a, sumdawng lirthei atanga sum lak hi bo se kan duh. Driver te laka receipt awm lo tur chhiah kan lak vak vak hi ram hmel tibaltu niin a hriat a, tih tawp tul a ni,” a ti. Lengpui Airport-ah pawnlam thlenga VIP leh VIP lo inthliarna awm chu, tih loh theih loh thil a nih loh chuan tih loh atana tha a ni tih a sawi bawk.
Minister Lalnghinglova Hmar pawhin journalism chu tun dinhmun a thlenna tura kawng a zawh tanna a ni, tiin, MJA member-te chu venpuitu ni a, thil thlen tawh hnua sawiseltu ni loa, a thlen hmaa finchhuaha thurawn petu ni turin a sawm a ni.
I&PR minister Dr Vanlalthlana pawhin chanchinbu khawvelah a mikhual loa, chanvo neia a lo tel ve thin tawh thu sawiin, MJA nen tha taka an thawhho a beisei tih a sawi a ni.