Mipa chin than, hmeichhe tana ngeiawm si

Mipa chin than, hmeichhe tana ngeiawm si
I ngaihzawng chu tha i ti viau, fel pawh i ti ru hle mai thei, mahse, a thil chin thenkhat chuan a ti thinrim fo si che. Hei le, mipa chin than thenkhat, hmeichhe tana ngeiawm si ni a relationship lama mithiam te sawi kan rawn tarlang a, hmeichhe tan pawh mipa chin than an tana ngeiawm si chu engtin nge an tih ang, tih te pawh kan rawn tarlang nghal e.
1. In pahnih chauha in awm dun lai pawhin tu te emaw SMS a thawn reng a, a nih loh pawhin tu te nen emaw phone-in an inbe reng a. In pahniha hlim taka in inkawmna tur hunah chutiang tih a chin avang chuan i lungawi lo ru hle thin. Mahse, relationship lama mithiam te chuan hei hi mipa sual vang leh a ngaih pawimawh loh vang che a ni lo niin an sawi a, chuvangin lungloha lak tur a ni lo. Polite takin in pahnih chauha inawm lai chuan thildang ngaihtuah lo va, in pahniha inkawm melh melh i thlahlel thin tih hrilh mai rawh.
2. Mipa chu eng thil emawah a ngaihdan lak i duh a, mahse, mipa chuan eng nge i duh tih a hriat loh vangin ngaihdan nei lo leh i duh duh dana ti mai turin a ti fo ang che, a nih loh leh a ngawi daih ang. Eng emaw a hriat loh i zawt a, hre lo nih a duh si lo va, ‘Chutiang a ho mai mai,’ te a ti leh daih ang. Chutiang chu thinrim pui mai tur a ni, a ngaihdan chu i tan a pawimawh tih tha takin hriattir zawk ang che.
3. Nilengin inah i lo buai a, i pasal hnathawk bang tlailama a lo haw chu in a lo thlen veleh i buai dan leh harsatna chi hrang hrang te a hnenah i lo thlen a, mahse, a ngaihsak lem lo che, a lo vin let zawk hrep che pawh a ni thei. Hei hi hre reng rawh, office-ah a buai em em pawh a ni thei. In a rawn thlen ve leh eng emaw tih tur leh harsatna te i lo hrilh nghal mai chuan in inhauh phah zek thei. Chuvangin, han chawlh hahdam tir phawt la, a mood te han recharge sela, chumi hnuah i ti ti pui chauh dawn nia.
4. In chhuak dun tur chu i insiam rei vangin a lo phun leh hman pek a! Hei hi mipa chin than a ni a, thinrim pui tur a ni lo. Mipa chuan insiam an awlsam a, an inpeih tawh hnuah chuan nghah reng che kha a ning thuai mai thin. A insiam zawh tawh hnua a lo tih tur ngaihtuah thiam la. Entir nan, in kalna turte kha an awm leh awm loh leh, in kal dawn tawh thu te lo va hrilh tir la. Kawngka leh tukverh te a inkhar fel tawh em tih te lo endik se la.