Mipa kum 18 chung lam chhuak lo turin inngen

Mipa kum 18 chung lam chhuak lo turin inngen
Manipur-a Zofate khawpui Churachandpur a ralmuan loh avangin mi engemaw zat an raltlan a, chutih laiin mipa kum 18 chung lamte chu chhuak lo turin an inngen.
Thu dawn danin, mipa kum 18 chung lam an chhuah hnem chuan an khua hi a ngaihtuahawm ang tih hlauhthawn thu-ah an inngen a, in nghaktu an awm a ngai a, chutah chuan mipa an tangkai ang tih chu an thlir dan a ni.
Tuna an buainaah hian Zo hnahthlakte hi kaihruaitu mumal nei lovin an awm a, an vaia an inthlunkhawmna pawl emaw rorelna emaw a awm loh avangin thil han tih a buaithlak chang a awm. Tlanchhuak lo tura mipa puitling inngen thu-ah pawh hian, a ngentu han sawi fak tur pawh an awm chuang lo a, a thahnemngai mi thenkhat awka niin, a theih ang angin an inhrilh chhawng a, ngaih pawimawh pawh a hlawh tih thu dawn a ni.
A kum bithliah chungchangah hian sawi dan a inang lo a, kum 16 leh kum 60 inkarte chhuak lo tura ngen an ni tih te, mipa kum 18 chung lam zawk alawm tih te, sawi dan leh hriat dan a inang lo. Singhat-ah chuan thalai thenkhatin raltlana chhuak turte motor lo tidingin thalai an tel em tih an lo en thin nia sawi a ni.
Churachandpur atang hian mi eng zat nge chhuak tawh ang tih hriat a har a, inchhiar a awm loh bakah mahni remchan dan dana chhuak an nih avangin a vel pawh sawi a har. |henkhat chuan 3000 chuang chu an ni tawh ang an ti a, 4000 vel tia sawi an awm bawk.
An tlanchhuah dan hi, bus leh maxi cab service te a awm loh avangin mahni lirthei hmuh remchan ang ang an hmang mai a, car te, sumo te, bolero te a ni tlangpui. Zirtawpni khan lirthei 500 velin Mizoram an pan a, a tukah chuan a hma aiin a tlem tih thu dawn a ni.
Churachandpur hi an ralmuang deuh deuh a, curfew a la ni chungin Chawlhni atang khan dawr hawn theih hun pawh siam a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More