By Debbie Rinawmi
Kan Zoram riang teah hian ni tin maiin thuthar leh thil thleng a awm a; chhiatna pawh rei tak ka sun thei tawh meuh lo a nih hi. Chutih laiin, hun rei tak ata min chenchilh tawhtu mipa thihna tam em em ringawt mai hian thinlung a ti na a, mang a ti ang a, hei zet hi chu nuai liam ve mai mai chi a ni ta hauh lo mai le. Chhungkuaah mi pakhat damlo an awm chuan chhungkuain kan tuar a, hlim a har thin; chhungte leh chenpuite na tuara an awm laia hlim taka nui huah huah thei an awm a nih chuan a chhungkua a hmangaih lo tawp a ni ti i la kan sawi sual kher lo maithei.
Kumin MTKP 69th Rorel Inkhawm Tuipui D lama neihah chuan kum 2022 chhunga |KP member thi 150 zinga 131 hi mipa an ni tih report a ni a, 87.3% mipa an thi a ni. CK|P Rorel Inkhawm 2023 Zemabawk Kohhran Biak Ina neih zawh tak khan kum 2022 chhunga K|P member thi mi 643 zinga 567 chu mipa an ni tih a tar lang ve leh a, mipa thihna hi 88.18% a ni. KTP member hi kum 15-40 an ni a, TKP member hi kum 14-40 an ni bawk a; hei hian mipa kan chan mai a ni lo va, thalai tam tak kan chan a ni tih a entir a. Mizorama kohhran pahnih kan han tar lan atang ringawt pawh hian kan tawrhna a nasa hle a, kohhran dangah pawh a danglam tam a rinawm loh a ni.
He thu hi politics-a kaih luh chi a ni lo va, hmeichhia leh mipa thuhla a ni hek lo; Mizo hnam anga min nghawngtu leh Mizo thalaite zawng zawng tawrhna a ni a; chuvangin a lo awm chhan leh a tihdamna tur kil tin atanga kan dap khawm a ngai a. He thuziakah hian ngaih dan pakhat tar lan a ni a, thutlukna siam a ni lo.
Ruihtheihthil vanga thi kan tam a, ruihtheihthil hrin natna hrang hrang avanga thi pawh kan thahnem hle. Amaherawhchu, ruihtheihthil hi kan thih tam chhan a nih rualin a lan chhuahna, a pawnlang ber mai a ni. A aia chhungril zawk kan khawrh chhuah a tul awm e. Hnam hrang hrang leh khawtlang hrang hrang awm- inchhungkhura hnathawh tur insem “domestic division of labor” an tih chu kan ramah pawh kum tam tak atangin kan lo ching ve a. Chutah chuan hmeichhia leh mipate ziak loh dana inkaihhruaina neiin tihtur chanpual an nei theuh thin a. Hmanlai chuan Mizote kha lo nei thin an ni a, lo neih bakah mipa te khan ram an vak a, tihtur tul a nih bakah an intihhlimna a ni pah a, chuvang a ni ang Mizo mipa te kha an thahruai thei hle niin a lang. In chhung lam erawh chu hmeichhe kuta dah a ni deuh ber a, zing ni chhuah hma atanga zan mut dawn thleng an kut a awl lo a ni a. Chutiang chuan Mizo mipa leh hmeichhia te kha an taima a, an thawkrim em em a ni.
Hun kal zelah khawsak dan a lo inher danglam khan mipa chu zirna lamah an kal uar a, kum 1901 chhiarpui neihah khan ziak leh chhiar thiam mipa 736 lai an awm laiin hmeichhia chu 25 chauh an la awm thung. Mizorama sikul ding hmasa pali-na Zosaphluia sikulah pawh khan a zirlaite chu tlangval leh rawlthar an ni deuh ber tih a ni a, hmeichhe lam chu an awm a nih pawhin sawi tham an ni lo a ni mahna. Zirna avang leh hmasawnna avangin ramsa kah te chu zawi zawiin an kalsan a, chuvangin an intihhlimna leh an chhuahvahna ber chu an bansan tih theih a ni a; chutih laiin hmeichhia erawh chu an hna a ngai reng a, mipa chuan an hnaa an ngaih a awm loh hnuah pawh inchhung lam hna chu hmeichhe chanpuala an la dah tho avangin a hma anga chet lakna an ngah lo va, thatho lamah pawh tun hma an tluk lo deuh em aw tih theih a ni.
Hengte hi sawi a ngaih nachhan chu mipa te hian “physical activities” an nei tlem ta em em a, an lo tih thin sa kah te chu changkanna chuan humhalh lam a kawh tlat avangin an thei ta lo va; an inawmtleina thenkhat chu dan bawhchhiatna a lo ni ta a. Taksa chet tam hi mihring hian kan lo mamawh khawp mai a, kan chet tlem chuan nghawng tha lo hi a nei awlsam khawp mai.
Khawthlang lamah khuan stroke te, lung na avang te, thaw hah leh chutiang lam avanga thihna a tam hle a; hemi chungchang hi C.D Reimers, G. Knapp leh A.K Reimers te chuan zir chianna an nei a. Heng natna hi chhan hrang hrang avanga awm thei an ni a, chung zingah chuan meizuk te, zunthlum te hi a langsar pawl tak an ni a. Heng natna nei hoah hian physical activities nei tha te hian 20%-35% in a nei tlem te aiin an dam rei zawk a, kum 3.4-4.0 in an dam rei zawk niin an tar lang a ni. Heng natna bakah hian thin tha lo te, ril natna leh cancer natna vei te ah pawh 30%-35% in an natna do kawngah an chak zawk a ni.
Physical exercise kan tih te pawh hian a hrana taksa insawizawina a kawh rualin nitin nuna kan taksa a chet tam chuan kan insawizawi a ni ve tho a, chung ang chuan insumtheihna te (Weinberg and Gould, 2015), mahni inrintawkna te (Marsh and Sonstroem, 1995; Fox, 2000; Zamani Sani et al., 2016) te leh a tha zawnga midang nena inkungkaihna min pe a (Raedeke, 2007; Bartlett et al., 2011).
National Cancer Registry Programme (NCRP) in a tar lan danin kum 2012 atang khan Aizawl district chu mipa cancer tam berna a ni a. Kum 2020 kuma report ah chuan mipa 43.3% zelin zuk leh hmuam kaihhnawih cancer an vei a.
Kan tar lan tak atang khan mihringin physical activities kan mamawhzia a lang a; hmeichhia chu taima lutuk lo pawhin ei rawngbawl leh hmun tihfai hi chu kan awl lo tlangpui a, mipaah chuan inhlawhfaa hnathawk lo chu an che tlem ta khawp mai, hna tam tak chu computer hmaa thuta chinfel theih a ni a, lirthei kan hmang uar bawk nen, inchhungkhur hi kan insawizawi na tur remchang tak a ni. He kan kalphung hi a tuar bertu chu mipa an ni a tih theih awm e. Kum tam tak chu kan vai liam a, mawhpuh tur dang kan zawng a, mahse kan thi ta zawih zawih a ni. Ruihtheihthil kan do a tul a, kum tam tak kan do a, kan do zel bawk ang; chutih rual chuan kan inkhap seng dawn lo va, chuti chung chung chuan engtin nge hei aia rei zawk mipa kan nun theih anga, kan hrisel theih ang tih ngaihtuah a tul hle a. Kan hmuh theih theuhah pawh ruihtheihthilin a ei chhiat tak tak an awm a, chung zingah pawh chuan inhlawhfaa hna thawkte chu an dam rei deuh zawk em aw a tih theih a ni. Heng dan kan siamte hi chu khawtlangin kan duan chawp a ni a, khawtlang chu chhungkuain a siam a, chhungkuaah chuan mimal tin te kan awm a. Chu chhungkua enkawlna kawngah chuan thutlukna siam kawngah chauh ni lo kan zavaia tel a tul em?
Inchhung sekrek khawih hi mipa leh hmeichhia inthliarna tur a ni lo va, kan dam khaw chhuah theih nana thiamna kan mamawh (survival skills) a ni zawkin a lang. Engpawhnise, Ian Hart-a chuan kohhran pa zinga mi John Calvin-a zirtirnaah pawh kohna kan dawn chu mihringpuite rawng inbawlsak tawn a ni tiin a sawi (126). Heng kan sawi tak te avang hian mipate an thatchhia kan tihna a ni lo va, kan hnathawh dan pawh a danglam ta zel a, chuvang chuan kan taksate sawizawina tur kan ngaihtuah a ngai a ni tih hi ka thuziak laimu a ni.
-- Advertisement --
Thuziak rawn te:
Bartlett, J.D., Close, G.L., MacLaren, D.P.M., Gregson, W., Drust, B., and Morton, J.P. (2011). High-intensity interval running is perceived to be more enjoyable than moderate-intensity continuous exercise: implications for exercise adherence. J. Sports Sci. 29, 547-553. doi: 10.1080/02640414.2010.545427
Fox, K.R. (2000). Self-esteem, self-perceptions and exercise. Int. J. Sport Psychol. 31, 228-240
Hart, Ian. (1995). The Teaching of Luther and Calvin about Ordinary Work: 2. John Calvin (1509-64). The Evangelical Quarterly, 67 (2), 121-135.
Mandolesi, Laura., Polverino, Arianna., Montuori, Simone., Foti, Francesca., Ferraioli, Giampaolo., Sorrentino, Pierpado., & Sorrentino, Gieuseppe. (2018). Effects of Physical Exercise on Cognitive Functioning and Wellbeing: Biological and Psychological Benefits. Frontiers in Psychology.9. Article e509. doi :10.3389/psyg.2018.00509
Marsh, H.W., and Sonstroem, R.J. (1995). Importance ratings and specific components of physical self-concept: relevance to predicting global components of self-concept and exercise. J. Sport Exerc. Psychol. 17, 84-104. doi: 10.1123/jsep.17.1.84
Msta, Ista. (2023, February 25). Mizo mipa te thih chhan tam ber: Zu. [Facebook post]. Facebook. https://m.facebook.com/groups/1547111345531105/permalink/3461591770749710/?mibextid=Nif5oz
PTI. (2020, August 20). Mizoram’s Aizawl district recorded highest cancer cases in India. Business Insider India. https://www.businessinsider.in/india/news/mizorams-aizawl-district-recorded-highest-cancer-cases-in-india/articleshow//77648427.cms
Raedeke, T.D. (2007). The relationship between enjoyment and affective responses to exercise. J. Appl. Sport Psychol. 15, 105-115. doi: 10.1080/10413200601113638
Reimers, C.D., Knapp, G., Reimers, A.K. (2012). Does Physical Activity Increase Life Expectancy? A Review of the Literature. Journal of Aging Research. ncbi.nlm.nih.gov/pmc/articles/PMC 3395188
Tlau, Zoa. (2023, February 22). Mipa kan va hek tak em! [Facebook post]. Facebook. https://m.facebook.com/groups/1547111345531105/permalink/349119134330307/?mibextid=Nif5oz
Weinberg, R.S., and Gould, D. (2015). Foundations of sport and exercise psychology, 6th Edn. Champaign, IL: Human Kinetics.
Zamani Sani, S. H., Fathirezaie, Z., Brand, S., Puhse, U., Holsboer-Trachsler, E., Gerber, M., et al. (2016). Physical activity and self-esteem: testing direct and indirect relationships associated with psychological and physical mechanisms. Neuropsychiatr. Dis. Treat. 12, 2617-2625. doi: 10.2147/NDT.S116811