Mipui huapzoa MUCHS siamthat phut

Mizoram Universal Health Care Scheme (MUHCS) kalpui danah sawrkarin zep ruk leh thup a ngah niin MNF hruaitu Dr Lalrinzuali chuan a sawi a. Thup then nei loa, mitin tana hamthatna huapzo health care tak tak pe ngei turin an phut tih a sawi.
MNF general secretary Dr Lalrinzuali’n thuthar thehdarhtute a hrilh danin, MUHCS-ah hian damdawia inenkawlna scheme nei sa reng, sawrkar hnathawkte leh ABPM-JAY (Golden Card nei) chu hamthatna pek belh awm chuang lo leh sawrkar hnathawkte phei chu an hamthatna lak then sak zawkin bilh luh tel vek an ni a. Damdawia inenkawlna (health coverage) engmah nei ve lo, a mamawhtu tak tak mipui nawlpui man chawia inziaklutte chu MUHCS 1.0-ah khan mi sing 2 chuang awrh an ni a, hei hi MUCHS hnuaia rin luh zawng zawng atanga 7% vel a ni tih a sawi. Civil pensioner-te pawh medical allowance an dawn thin atanga MUHCS-ah hian sum chhunluh tir an ni tih a sawi bawk.
“Damdawia inenkawlna (scheme/rules) nei sa MUHCS kawma tuam tel vek an nih avang hian scheme lianpui angin lang mah se, a takah erawh health care scheme mamawhtu tak tak, engmah nei lawk ve lo, man chawia inziaklut (contributory beneficiaries) chu chhungkaw 20213 chauh an ni. MUHCS hi a funna lian tak, a tak erawh te reuh te ni si a ni,” ti.
Health scheme engmah nei ve lo, a mamawhtu tak tak, contributory beneficiaries inziaklut an tlem chhan chu inziah luh man a san vang niin a sawi a. Mipui nawlpui ban phak a ni loa, kohhran hialin an kohhran mi leh sa, inziahluhna nei lote puih an inhuam thu an auchhuahpui a, sawrkar tan thil zahthlak a ni tih a sawi. Hetihlaia ‘kohhran hote pawhin tha min tih pui’, ti zawnga sawrkar hotuten an sawi duh mai phei hi chu, mi harsa zawkte dinhmun an hriatpui phak loh zia lanna leh mirethei zawkte hmuhsitna lam a hawi zawk tih a sawi a ni.
“MUHCS hi kum khat kalpui a nih tawh hnuah pawh Mizorama private hospital tha zual zinga zawm duh an la awm lo hi sawrkar hlawhchhamna a ni. Sawrkar hian langtlang takin a indawr pui loa, phai lam leh Mizorama damdawi in thenkhat chu a ruka inremna siampuiin, an inremna chu Assembly House-ah pawh MLA ten an zawt chhuak zo lo a. Thalaite tana hna tam tak siamtu, private hospital-te chu dawmkan a hnekin ZPM sawrkar hian sawrkar chakna zawng zawng hmanga hrek beh a tum mek a ni,” Dr Lalrinzuali hian a ti.
Sawrkarin Mizorama private hospital-te an dawr danah ni khata damloten an hman theih tur zat bithliah hniam tak barh luih a tum nia sawiin, mipui hnenah cheng nuai 5 thleng hmang thei anga an hrilh laiin, ni khata an sum hman theih tur zat bituk sak an ni tih a sawi a. Damlo hnenah sum tam tak nei anga an puanzar lai a, an nikhat hman theih zat hniam te te an bituk sak leh si chu private hospital-te hrek beh tumna tih loh theih a ni lo tih a sawi.
MUHCS hmanga damlo enkawlna senso sutkian sak tawh leh ni mekte an lawmpuiawm rualin, mipui tan hei aia tha leh changtlung, langtlang leh awlsam zawka hman theih chu sawrkarin chhawpchhuah sak se an duh tih MNF hruaitu hian hian a sawi a ni.