Sawrkar kaltaah transformer hlui a thar anga lei a awm niin kan hria – F Rodingliana

Sawrkar kalta lamah ziakah chuan awm lo mah se, transformer hlui, a thar anga lei a awm ngei nia an hriat thu minister F Rodingliana chuan a sawi.
AMC inthlan atana an party-in street campaign an neihah ZPM hruaitu ni bawk F Rodingliana chuan, mipui hnena an tiam angin electric bill chu an sawrkar hnu in an la tisang lo tih a sawi a. Mipui hnena an intiamnaah hian an la rinawm reng tih a sawi.
“Kalphung hlui sawrkar hnuaiah khan transformer hlui a thar anga lei hi a ziakah chuan awm lo mah se, a takah a awm niin kan hria. Kan sawrkar tirh khan transformer leina tur cheng vaibelchhe 10 kan nei a, 58 kan lei thei. A chhan chu, direct manufacturing-ah kan lei a, kum hnih leh a chanve chhungin transformer 160 kan lei hman a ni. Sum hi a tam leh tlem lam ni loin, dik taka kan hman chuan a daihzai a ni,” Power & Electricity minister hian a ti.
ZPM sawrkar chuan kum 5 chhunga power-a intodelh an tum tih a sawi a. Hydel project leh nizung chakna hmangin a tam thei ang ber siam chhuaha intodelh turin hmalakna tam tak an nei mek tih a sawi.
“Power kan intodelhna atana hma kan lak meknaah hian corruption-in min tih buai ka duh loa, compensation-ah kan fimkhur em em a. Tunhma anga politician-ten emaw an chhungten emaw compensation lakna tura ram an lo nei teuh ang kha a awm tawh lo. Chief minister atangin kan fim tlat tawh,” F Rodingliana hian a ti .