Mipui lalna…
Kan thenawm Myanmar ram chu mipui lal lohna, sipai lalna ram a ni a, ram inrelbawlna a mumal lohzia leh a ram mipui ten an tawrh nasatzia mit leh benga hmua hretute kan ni.
Kan thenawm ram atang mai pawh hian democracy sawrkar hlutzia chu sawifiah vak pawh ngai lovin a lang chiang nghal a, sawi tam ngai lovin kan hmufiahin kan hrefiah vek mai awm e.
Hetih lai hian, keini democracy rama awm inti mipuite hian kan aiawha roreltu tur kan thlanchhuah kawngah hian rilru fim tak kan put loh chuan, thenawm ram dinhmun ang lek hi kan dinhmun a chang ve thei tho tih hi kan hriatchian a pawimawh awm e. Roreltu tur thlang thei kan ni hi kan vannei a, kan vanneihna hi kan hman thiam loh chuan vanduaina thlentu erawh a ni ve thei tho tih kan hriat a pawimawh bawk awm e.
Chumi awmzia chu, inthlang ram kan nih angin, mipuiin kan aiawha ram inrelbawlna hna thawka rorel tur kan thlang thin a, aiawh kan thlanchhuahte kaltlangin, indirect-in ro kan rel tihna a nih chu. Roreltu tur kan thlanchhuah kawngah hian vote thlak kan ngaih pawimawh loh a, vote kan thlak peih loh vang emaw, kan duhtui loh a, vote hralh kual vel mai mai chunga inthlanna hi kan namnul a nih chuan, chutiang hnuaia kan thlanchhuah kan aiawhtute chuan felfai takin ro an rel a rinawm loh a. Rorelna dik lo leh fel lo hnuaiah chuan mipui leh ramin hma a sawn ngai dawn lo tih a lang reng a ni.
Kan hma lawkah kan inthlang dawn a ni a, vote thlak ni hi mipuite rorel tura kan kalkhawm ni a ni ve a, thahnemngai tak leh tihtak zeta rilru seng chunga vote thlak kan ngaih pawimawh phawt chuan chu chu Siamtu pawhin mal a sawm ngeiin a rinawm a, ram leh mipui pawhin hma a sawn phah ngeiin a rinawm.
Mizoramin inthlanpui a hmachhawn tawh zawng zawngah 2013 kha vote tlak that ber tum a ni a, 83.41% a tla a, 2008 khan 82.34% tlain pahnihna a ni a, 2018 khan 81.54% tlain a pathumna a ni bawk.
Mipui lam pawhin inthlan pawimawhzia kan varpawh chho tan zel niin a lang a, democracy innghahna lungphum hi vote a ni a, vote neitu chu nangmah kha i ni a, chuta tang chuan i pawimawhzia i hre thei ang.