Mipui sawrkar ni loin party sawrkar tho an ni – BJP

ZPM sawrkar chet dan leh an minister-te thusawi danah tun sawrkar chu inthlan hmaa an intiam ang – mipui sawrkar kalphung thar ni loin, a hluite tih dan entawn, party sawrkar tho a nih zia a langchiang zel tih BJP Mizoram chuan an sawi.
BJP Mizoram State thuchhuak chuan, mipuiin kalphung thar hmuh beiseiin ZPM an thlangtling a, kalphung thar zuartuten a hlui tih dan an entawn leh tho hi mipui zahlohna leh mipui bumnaah an ngai tih a sawi.
‘ZPM kalhmang en hian mipuiin kan beisei kalphung thar hmuh tur a awm lo hle a, ZPM party office-a minister-te thusawiah pawh party dangin a an tih thin, mipuiin tha lo kan tihte sawi chhuakin, departmental work pawh party mite pek chu party dang tih dan a nih ve tho avangin, an tih ve tho tur thu an sawi ta mai hi a pawi a; mipui sawrkar ni lo, party sawrkar tho a nih zia tichiangtu a ni,’ a ti. Tun sawrkarah departmental work-in pawngsual a tawk ve leh ngei dawn tih a chiang hle ah an ngai tih a sawi bawk.
Mipuiin MNF leh Congress an hnawl chhan chu, kalphung thar tha zawk mipui sawrkar an beisei vang a ni, tiin, inthlan dawnah tuna chief minister ni ta pawhin, MNF leh Congress tih ang an tih ve loh tur thu mipui hnenah a sawi chungin, sawrkar tawhte tih dan ang tho an tih ve duh avangin kalphung thar chu a taka kan hmuh a rinawm ta lo hle tih a sawi a ni.
‘Hetiang taka Mizoramin political party kan ruihchilh hi a ram leh hnam ang pawha kan hnufual chhan ni ah kan ngai a. Political party-ten mipui hmaa kan intiamna anga hma lak hi kan tih ngei tur a nih laiin, mipui hmaa kan thutiam kan tih theih loh hnua sawimam leh ching tawh a, development politics hi kan intlansiakna tur a ni tih hre thar turin party tin kan chah a ni,’ BJP Mizoram chuan a ti.