Mizoram tlawhtu Union Minister of State for Communications Devusinh Chauhan chuan Pathianni khan Aizawlah Department of Telecommunications (DoT), Department of Posts (DoP) leh BSNL hotute chu Mizoram mipui tana an hnathawh leh rawngbawlna a thlirpui.
Union MoS chuan mipui rawngbawlna kawngah tunlai thiamna thar hman a pawimawh tih sawiin, Mizoram ang state, agriculture leh thil dehchhuah tam lohna hmunah information leh communication technology-in dinhmun pawimawh tak a luah avangin ICT service chu thalai leh thangtharten eizawnna kawng hrang hranga an hman tangkai theihnan tun aia tha zawka duan leh siam a pawimawh, tiin, hemi kawngah hian DoT leh BSNL chu tan la lehzual turin a chah. Post Office hnuaia bank, India Posts Payment Bank chuan mipui a thlen zau zawkna’n hemi kawngah tan lak ngai nia a hmuh thu a sawi bawk.
DoT, DoP leh BSNL hotute chuan a hran theuhin power point presentation hmangin Mizorama an dinhmun tlangpui, an hnathawh leh mipui tana service hrang hrang an pek leh, tha zawka an ruahman mek dan, sum an thawhchhuah dan, hmachhawp leh harsatna an sawi a. Central Assistance to States for Capital Expenditure hnuaia Mizorama district khawpuite leh block khuate tha zawka internet connectivity inthlunzawmna tur project, cheng vaibelchhe 50 hu ICT department kaltlanga ruahman pawh sawi a ni.
Mizoramah Head Post Office 1, Sub Postal Division 4 leh Post Office leh Branch Post Office 387 a awm mek a. DoP tarlan danin, Assam tiam loin hmarchhak state hrang hranga khaikhinnaah Mizorama Post Office-te chuan sum an thawkchhuak tha tih sawi a ni.
DoT tarlan danin Mizorama khaw awm zawng 877 atangin khaw 724 chu mobile service leh a kaihhnawihten an tuam tawh a. BSNL-in 4G Saturation Project kaltlangin khua leh hmun 181 (army outpost 24 tiamin) 4G service pek theihna an ruahman mek a, heng zinga khua leh hmun 63 chu mobile service a la thlen miah lohna hmun an ni.
Mipui tan tang turin inbiakpawh lama hotute Union MoS-in chah
Get real time updates directly on you device, subscribe now.
Next Post