Mipuiin min thlamuanpui tur a ni – Home minister

Mipuiin min thlamuanpui
tur a ni – Home minister
Home minister K Sapdanga chuan police-te avangin mipui an thla a muang tur a ni, tiin, chumi chu tihhlawhtlin tum turin a chah
A office a luah hnua a hmasa ber atan Home minister hian Thawhtanni khan Khatla-a Police Headquarters (PHQ) a tlawh a, police hotute nen an inkawm. Chief minister-in ni 100 chhunga an tih tur a puan tawh thu leh a ni kaihhruaina hnuaiah mipuiin an beiseina ang tihhlawhtlin ngei an tum tur thu sawiin, police hotute chu chief minister-in ni 100 chhunga tih tur a sawi a, an department kaihhnawih awmte tihlawhtling turin a chah.
“Thawhhona tha tel lo chuan department-in hma a sawn lo ang. A tuar tur chu mipui an ni. Mipui himna atana thawk turte kan ni a, mipuiin min en sang. Chuvangin, keimahni vangin mipui an thla a muang tur a ni,” K Sapdanga hian a ti.
Ruihhlo do kawngah theihtawp an chhuah dawn tih sawiin, “Police-te in thawkrim em em tih ka hria. Misual hi an fing ve zel a, chuvangin hma kan sawn ve zel a ngai. In laka thupek pe ringawt tur ni lo, thawhpui tur cheu in ka awm a ni,” a ti.
Tul loah inkhawhral lo turin Home minister hian a chah lawk a. “Inrenchem taka kal a ngai. Sum lakluhna tur lam ngaihtuah a, kan resource kan hman tangkai a tul. Kan thil tum a hlawhtlin theihnan min puih kan ngai. Engtik lai pawhin in rawtna leh thurawn ka dawngsawng thei reng a ni,” a ti.
DGP Anil Shukla chuan police an indaih loh nasat thu minister hi a lo hrilh a. Sanction post atangin 33% vel hnawhkhah lohin a awm. Police modernisation scheme-ah state-in 10% pawh kan pek theih loh avangin sum hmuh tur la hmuh loh cheng vaibelchhe 9 vel a awm, building lamah pawh harsatna an tawk, tih te a lo hrilh.