Mipuiin thil an chik tawh, tih mai mai a rem lo – Christina Roluahpuii

Mipuiin thil an chik tawh, tih mai
mai a rem lo – Christina Roluahpuii
Tunlai khawvelah miin thil an chik tawh a, tunhma anga thil tih mai mai a rem tawh lo tih Aizawl Municipal corporator Christina Roluah-puii Sailo chuan a sawi.
Zirtawpnia ZPM party political session neihah ZPM AMC corporator hian ZPM chuan kalphung thar, mipui sawrkar tih a tlangaupui a, mipui pawhin an thlawp viauin a hriat tih a sawi a. Mipuiin kalphung hlui an ning tawh a, kan ram dinhmun an thlirin kalphung thara kal ve an chak tawh tih a sawi.
Hei vang hian sawrkarna an siam hma atangin kalphung thara an kalpui tan a ngai a, a bikin mipuiin an thlanchhuahten mawhphurhna sang tak an nei tih sawiin, “AMC-ah corporator 19 kan awm a, chung zinga paruk chu ZPM kan ni. Party dang corporator nena kan danglamna mipuiin an hmu lo a nih chuan kan hotuten uar taka an tlangaupui kalphung thar mipui sawrkar hi corporator-te vang hian an ring zo lo palh thei. Tunlai khawvelah miin thil an chik tawh a, tunhma anga thil tih mai mai a rem tawh lo. Corporator-te hian fund kan ngah lo viau rualin, kan neih chhunte engtin nge kan hman tih hi mipuiin an ngaihven reng a ni,” a ti.
MLA-te chu session-a an perfomance-te mipui thlir theih turin a awm a, corporator-te chu an fund hman dan chu mipuiin an teh theihna pawimawh ber pakhat a ni tih a sawi.
“ZPM AMC corporator-te ah hian Aizawl mipuiin kalphung thar, mipui sawrkar an hmuh phawt chuan kan hotute tan chuan kan thil tum hi tlangaupui a nuam lehzual ang. Aizawl mipuiin kalphung thar an hmuh phawt chuan an thawm hi thingtlang lama kan unaute beng pawh a thleng ngei ang,” Christina Roluahpuii hian a ti.