FCI-in Sairang kudam zo hnai
Food Corporation of India-in Sairanga kudam an sak thar pahnih chu zawh hnaih a ni tawh tih an sawi.
Zirtawpni khan FCI Mizoram State Consultative Committee chu an chairman, Rajya Sabha MP K Vanlalvena kaihhruaiin Aizawlah an thukhawm a. Buhfai chawkluh kawnga an dinhmun leh buhfai dahna kudam dinhmun leh thil pawimawh dang an sawi ho.
Thutkhawma report danin, FCI-in rel lut tur behchhana Sairanga kudam/ depot an siamah, metric ton 5000 lehnna leh a dang MT 2500 lenna chu hna zaa 80 an zo tawh a, MT 2500 tho lenna kudam dang leh pawh siam tumin a hmun tur laihzawl mek a ni.
Buhfai an chawlut tha a, an depot-a dah sa pawh a tam tawk tih FCI hian an sawi a. Tun dinhmunah Mizorama an depot 6-ah buhfai MT 20034 an nei a, hei hi thla 4 vel tla a ni tih an sawi. State sawrkar Supply kudam-ah an supply hneh tawk hle tih an sawi bawk. Bairabi-a an depot chu MT 5000 lenna niin, FCI hotuten tilian tura an tih angin, rem san deuh theih turin an ruahman a, tunah hian MT 6264 a dah theih tawh tih an sawi a ni.
An harsatna an sawiah rel hmanga Bairabi Rel Station-a buhfai rawn phurh chu a hlanthlakna platform-in chung a neih loh avangin, truck mal te tea hlanchhawn a ngai a, rel a din rei phah thin avangin FCI hian Railways hnenah tum khat buhfai phurha an din rei man an chawi hi cheng nuai tel a ni reng tih an sawi a. Platform chung nei an mamawh bakah, kawngpui pangngai atanga rel station panna km 0.9 vel chauh chu a chhe hle a, Railways hnenah siamtha tura an ngenna chu tihhlawhtlin ala ni lo reng a, hei hi state sawrkarin emaw siamthat sak thei mai se an duh hle tih an sawi a ni.
FCI-in Sairang kudam zo hnai
Get real time updates directly on you device, subscribe now.
Next Post