MIS officer tharte inzir zel

District Information & Public Relations Office leh district inrelbawlna kawnga pawimawh zirchiangin Mizoram Information Service (MIS) officer thar 5 chuan Nilaini khan Champhaiah DRDO Champhai project director Lalrinawma, SP charge la mektu addl. SP Lalmalsawma Hnamte te an kawm a, MJA Champhai District member-te nen an inkawm bawk.
DRDO office-ah hian DRDO kalphung, thingtlang hmasawn nana rural development scheme hrang hrang kalpui dan hrilhfiah an ni a. SP office-ah hian Champhai District Police hmalakna leh security kaihhnawih pawimawh hrilhfiah an ni.
District IPRO leh MJA member-te nen an inkawmnaah DIPRO Champhai Dr Lallawmkima chuan an department leh MJA-in sawrkar thuchhuah, mipui hriat tur puanzar kawngah thawhhona tha tak an neih dan a sawi a. MJA Champhai District vice president Lalhlupuia’n thu a sawi bawk.
MIS 2024 batch mi 5-te hian district office-a inzirna hi Kolasib district-ah an lo nei tawh a, Champhaiah hian May 10 thleng an cham ang. Ruahman dan chuan May thla tawp hian Lunglei district an tlawh leh dawn a ni.